Erlikpen ushtasqan eńbegi elengender arasynda Tótenshe jaǵdaılar mınıstrligi «Apattar medısınasy ortalyǵy» MM Shymkent qalasy boıynsha fılıaly «Qazyǵurt» trassalyq medısınalyq-qutqarý pýnktiniń feldsheri Kóbenov Tımýr Qorǵanbekuly da bar. 2013 jyldan beri respýblıkalyq mańyzy bar Termez - Tashkent - Almaty kúre jolyndaǵy apat ornyna aldymen jetetin keıipkerimiz kásibiniń ár kúni jedel áreketten turatynyn tarqata aıtty.
«Jol muraty - jetý. Dese de jol boıy qaýipsiz, tosyn oqıǵalardan ada emes. Sondyqtan jolaýshylar dittegen jerine jete almaı, jol-kólik oqıǵalary tirkelip jatady. Sondaı sátte zardap shegip, ómirine qaýip tóngenderge alǵash bolyp medısınalyq kómek kórsetýge biz mindettimiz. Olardyń aýyrsynýy, jaraqaty ýshyǵyp, shokqa túsip qalmaýy úshin kúsh salamyz. Qajetti kómek kórsetilgennen keıin eń jaqyn mańdaǵy aýrýhanalarǵa tasymaldaımyz», degen Tımýr Qorǵanbekuly zardap shekkenderdiń jaraqaty múgedektikke aınalmaýy úshin edel-jedel etken eńbegi aqtalsa, naýqastyń júregi qaıta soqsa mindetin múltiksiz atqaryp júrmin dep esepteıtinin atap ótti.
«Qatelikti keshirmeıtin jol ústinde shalt qımyldaýǵa bolmaıdy. Adam taǵdyry bizdiń durys sheshimimizge baılanyp turady. 12 jyldan beri osy mindetti atqaryp, ómirge úmit berip júrgenim marapattyń tóresi», deıdi ol.
Osylaı ár sekýndtyń qymbat ekenin tereń uǵynatyn maman búgin «Qurmet» ordenin keýdesine taqty. Keıipkerimiz Memleket basshysynyń qolynan alǵan marapat jaýapkershilik júgin eseleı túskenin, budan ári de adamdardyń amandyǵy úshin adal ter tógýge daıar ekenin basa aıtty.
