Latvııada 31 mekteptiń oqýshylary 10-synypta oqymaıdy

ASTANA. 7 tamyz. Latvııada ornalasqan 395 mekteptiń ishindegi 31 oqý ornynda 10-synyp ataýly múldem joq. Bul týraly ras.kz habarlady. Latvııanyń Bilim jáne ǵylym mınıstri radıoǵa bergen suhbatynda sondaı-aq, joǵarydaǵydaı mektepterdiń 11-i Rıga qalasynda ekenin aıtty. Saıasatker mysal retinde 10-shy da, 11-shi de synyptary joq, tek 12-shi synyby ǵana bar Indra mektebin keltirdi. Seıleniń pikirinshe, mundaı bilim mekemeleri shákirtterin tıisti bilim deńgeıimen qamtamasyz ete almaıdy. «Árıne, teoretıkalyq jaǵynan biz synyp úshin bir balany otyrǵyzyp, oqýdy qamtamasyz ete alamyz. Biraq bizdiń el retinde bylaı jasaýǵa quqymyz joq ekenine de senimdimin», – dedi mınıstr. Bilim jáne ǵylym mınıstrligi usynǵan pedagogtardyń eńbekaqylaryn tóleýdiń jańa modelinde 12 oqýshydan az synyptary barp mektepter jabylýǵa tıis. Osy turǵydan kelgende, Latvııada qazir 80 mektepti jabýǵa týra keledi. Bul týraly mınıstrdiń keńesshisi Kaspar Berzınsh BNS telearnasynda sóılegen sózinde aıtty. Eger synypta 12 baladan kem bolsa, onda mektep osy oqýshylardy oqytý úshin memleketten qarjy almaıdy. Al jergilikti bılik shaǵyn mektepter báribir kerek dep eseptese, olardy ustap turý úshin qajetti qarjyny ózi taýyp beredi. «Biz el retinde shaǵyn mektepterdi ustap otyrýǵa jol bere almaımyz», – dep túsindirdi osy oraıda Berzınsh. Sheneýnikterdiń esepteýleri boıynsha, barynsha tıimdi nátıjege qol jetkizý úshin synyptar 15-25 oqýshy tóńireginen jabdyqtalýy kerek eken. Eger bala sany budan kóp bolyp jatsa, ol da shákirtterdiń úlgerim deńgeılerine keri áser etedi. Mınıstrler kabıneti bilim berý men muǵalimderdiń eńbekaqylaryn tóleýdiń jańa modelin 11 tamyz kúni ótetin otyrysynda talqylaıtyn bolady. Talǵat Raıymbek. Derek, sýret: ras.kz.