Jıynǵa alǵash ret daýys berý quqyǵy bar jasandy ıntellekt negizinde jumys isteıtin dırektorlar keńesiniń táýelsiz sıfrlyq múshesi SKAI (Samruk-Kazyna Artificial Intelligence) qatysty. Qazaqstandyq Alem LLM tildik modeli negizinde qurylǵan bul neırondyq jeli buǵan deıin Digital Bridge 2025 halyqaralyq forýmy aıasynda Memleket basshysyna tanystyrylǵan bolatyn.
Otyrystyń kún tártibinde Qor qyzmetiniń bıylǵy 9 aıdaǵy qorytyndylary qaraldy.
Prezıdenttiń iri ınfraqurylymdyq jobalardy júzege asyrý jónindegi tapsyrmalaryn oryndaý barysyna nazar aýdaryldy. Jambyl oblysynda jel energııasy úshin komponentter shyǵaratyn zaýyt iske qosyldy. Jańaózende qýaty 50 MVt kún elektr stansasy paıdalanýǵa berildi. Qosshy qalasyn gazben qamtýǵa arnalǵan alǵashqy iske qosý kesheni ashyldy. Uzyndyǵy 409 shaqyrymdy quraıtyn jańa ınfraqurylym saǵatyna 32,8 myń tekshe metrge deıin gaz tasymaldaýdy qamtamasyz etedi. «Dostyq – Moıynty» ýchaskesindegi ekinshi jol paıdalanýǵa berildi. Bul temirjol jelisiniń ótkizý qabiletin edáýir arttyrady, júk tasymalyn jedeldetedi jáne elimizdiń eksporttyq áleýetin damytýǵa jańa múmkindikter týǵyzady. Uzyndyǵy 302 shaqyrym bolatyn jańa «Taldyqorǵan – Úsharal» magıstraldy gaz qubyry paıdalanýǵa berildi. Qor energetıka, kólik, sıfrlandyrý salasyndaǵy aýqymdy bastamalardy júzege asyrýdy jalǵastyrýda.
Dırektorlar keńesiniń músheleri jobalardy iske asyrý tıimdiligine qatysty birqatar másele kóterdi. Qordyń basqarma tóraǵasy Nurlan Jaqypov jalpy alǵanda qarjylyq kórsetkishterde turaqty oń dınamıka bar ekenin baıandady. О́ndiristik nátıjeler josparlanǵan mánder deńgeıine sáıkes keledi. Monıtorıng nátıjesine sáıkes Qor tobynyń iri ınvestısııalyq jobalary boıynsha qarajatty ıgerý kórsetkishi 99%-dy quraıdy.
Premer-mınıstr Dırektorlar keńesi músheleriniń nazaryn Qordyń otandyq taýar óndirýshilerdi qoldaý jónindegi buǵan deıin berilgen tapsyrmalardy oryndaýy máselesine aýdardy.
Dırektorlar keńesiniń sıfrlyq múshesi SKAI bıylǵy 9 aıda Qordyń otandyq taýar óndirýshilerdi qoldaý kólemi artyp, ótken jyldyń sáıkes kezeńimen salystyrǵanda 75%-ǵa jetkenin habarlady. Otandyq taýar óndirýshilerden taýar satyp alý 721 mlrd teńgeni qurady. Barlyǵy 497 otandyq taýar óndirýshimen 7 227 shart jasaldy (2024 jyldyń 9 aıynda bul kórsetkish 411 mlrd teńge, 516 OTО́-men 414 shart bolǵan edi). SKAI-dyń baǵalaýy boıynsha, bıylǵa arnalǵan satyp alý jospary Wabtec-ke qaraıtyn otandyq óndirýshiden lokomotıvter satyp alý týraly mámile esebinen aıtarlyqtaı asyra oryndalady.
Otyrysta sondaı-aq Prezıdenttiń «Taza Qazaqstan» bastamasynyń júzege asyrylýy týraly aqparat tyńdaldy, onyń sheńberinde «Samuryq-Qazyna» toby kompanııalarynyń qyzmetkerleri shamamen 1 mln aǵash otyrǵyzady. Sonymen qatar ınklıýzııa, sport jáne medısına salasyndaǵy áleýmettik jobalar týraly aqparat usynyldy. Búgingi tańda 87 nysan bazasynda, onyń ishinde sport keshenderi, ońaltý ortalyqtary men ınklıýzııany qoldaý kabınetterinde 700 myńnan astam adamǵa áleýmettik qyzmet kórsetilýde. Jyl sońyna deıin Qor birqatar nysandy, sonyń ishinde Mańǵystaý jáne Batys Qazaqstan oblystarynda jańa sport keshenderin ashýdy josparlap otyr.
Otyrys qorytyndysy boıynsha «Samuryq-Qazyna» qorynyń basshylyǵyna ınfraqurylymdyq jobalardy ýaqtyly paıdalanýǵa berýdi qamtamasyz etý jáne otandyq taýar óndirýshilerdi qoldaý jumystaryn kúsheıtý tapsyryldy. Taýarlar men qyzmetterdi satyp alýda otandyq qamtý úlesin arttyrý qajet.
