Senat tóraǵasy TúrkPA Bas hatshysymen dıdarlasty

Kezdesýde Ázerbaıjannyń Gabala qalasynda ótken Túrki memleketteri uıymynyń HII sammıtiniń qorytyndysy keńinen sóz boldy. Naqty aıtqanda, ekonomıkanyń negizgi sektorlary boıynsha TMU-ǵa múshe memleketterdiń ıntegrasııasyn nyǵaıtýǵa, halyqaralyq máselelerde ózara qoldaýǵa, óńirlik qaýipsizdikti qamtamasyz etýge jáne mádenı-gýmanıtarlyq is-qımyldy damytýǵa arnalǵan Gabala deklarasııasynyń negizgi baǵyttary talqylandy.

«Bizdiń kezdesýimiz elderimiz­diń ózara is-qımylynyń joǵary deńgeıin rastap, túrki ıntegra­sııa­synyń jańa baǵdaryn belgi­lep bergen Gabaladaǵy Túrki memle­ketteri uıymynyń sammıti­nen keıin ótip otyr. Qazaqstan Prezıdenti Qasym-Jomart Toqaev sol jıynda túrkitildes halyq­tardyń jaqyndyǵyna erekshe toqtalǵan bolatyn. Memleket basshysy túbi bir túrki jurtynyń tarıhy tamyrlas ekenin jáne bizdi ortaq qundylyqtar biriktireti­nin tilge tıek etti. Munyń bári berekeli baýyrlastyǵymyz ben yntymaǵymyzdyń jarqyn kórinisi ekeni anyq. Gabala sammıti­niń nátı­jeleri Parl­ament­tik Assam­b­leıa aıasynda yntymaq­tastyqty odan ári nyǵaıtýǵa, kelisilgen zań­na­­malyq tásilderdi ázirleýge jáne birlesken jobalardy iske asy­­rý­ǵa oń septigin tıgizedi dep sene­­min», dep M.Áshimbaev Qazaq­stan TúrkPA-nyń qazirgi tóraǵa­sy re­tin­de Uıymnyń túrki memleket­teri men halyqtarynyń ıgiligin kóz­deı­tin bas­tamalaryna jan-jaqty qol­daý kórsetýge daıyn ekenin aıtty.

Sonymen qatar taraptar qazirgi tańda TúrkPA túrki ıntegrasııasynda parlamentaralyq dıalogti nyǵaıtatyn jáne el­der­diń zańnamalyq bastamalaryn úılestiretin mańyzdy alań retinde erekshe oryn alatynyna nazar aýdardy. Senat tóraǵasy óz sózinde bul baǵyttaǵy yntymaqtastyqtyń perspektıvalaryna da toqtalyp ótti.

«Qazaqstan Parlamenti TúrkPA aıasynda belsendi ynty­maq­tastyqty arttyrýǵa jáne jańa bastamalardy júzege asy­rýǵa múddeli. Qazirgi tańda túrki elderiniń parlamenttik dıp­lomatııasy belsendi damyp keledi. Sondyqtan ortaq úılestirýshi organ – TúrkPA hatshylyǵynyń qyzmetin odan ári jetildirýdiń mańyzy zor», dedi M.Áshimbaev.

О́z kezeginde Ramıl Gasanov bıyl maýsym aıynda Astanada TúrkPA-nyń plenarlyq sessııasy sátti ótkizilgenin aıtty. Atalǵan sessııada birqatar model­dik zań qabyldanyp, TúrkPA-nyń 14-plenarlyq sessııasy­nyń Astana deklarasııasy ma­quldanǵan edi. Sondaı-aq Túrki mem­leketteri Parlamenttik Assamb­leıasynyń Bas hatshysy ty­ǵyz yntymaqtastyq jáne parla­ment­aralyq baılanystardy ny­ǵaıtý jolyndaǵy belsendi jumys úshin rızashylyǵyn bildirdi.

Suhbat kezinde qazaq-ázerbaı­jan arasyndaǵy ekijaqty is-qımyl­dy ári qaraı damytý másele­leri de sóz boldy. Buǵan qosa Ázer­baıjan men Armenııa arasyndaǵy beıbit qatynastar týraly deklarasııanyń mańyzyna mán berildi.