Meshit «Semey Smart City» yqsham aýdanyndaǵy eń iri ári sáýlettik kelbeti erekshe nysandardyń biri bolmaq. Munda bir mezette 5 000 adam qulshylyq ete alady.
Oblys ákimi qurylys basynda meshittiń oblys aýmaǵyndaǵy eń iri ǵıbadat orny bolatynyn aıtty.
«Arhıtektýralyq sáýleti kelisken, erekshe meshit salynaıyn dep tur. Abaı eli, Semeı jurty kópten kútken mundaı aýqymdy meshit oblysymyzda ǵana emes, osy tóńirekte joq. Halyqqa tek rýhanı ǵana emes, mádenı qyzmet kórsetetin ortalyq bolady. Abaıdyń 180 jyldyq mereıtoıy aıasyndaǵy musylman jamaǵattyń birlesken jobasy dep aıtýǵa bolady. Bul meshit Alashtyń rýhanı astanasyna óte qajet. Osyndaı qoly ashyq, jomart jandardyń demeýshiligimen salynǵaly jatyr. «Abaıǵa qurmet» aksııasy aıasyndaǵy alǵashqy úlken joba dep aıtýǵa bolady», dedi oblys ákimi.
Jańa aýdanda 75 myń turǵynǵa arnalǵan zamanaýı turǵyn úı keshenderi, 40-tan astam ákimshilik, kommersııalyq jáne áleýmettik nysandar, saıabaqtar men demalys aımaqtary salynady.
Memleket basshysy Qasym-Jomart Toqaevtyń qoldaýymen bastalǵan «Abaıǵa qurmet» aksııasy aıasynda elimizdiń birneshe óńiri Semeı qalasynda bir nysan salyp berýge óz usynystaryn berdi. Atap aıtqanda, Mańǵystaý oblysy Dostyq úıin, Shymkent qalasy shyǵarmashylyq ortalyǵyn, Túrkistan oblysy kórme ortalyǵyn, Astana qalasy «Keleshek» mektebin, Aqtóbe oblysy jekpe-jek ortalyǵyn, Pavlodar oblysy ústel tennısi ortalyǵyn, Soltústik Qazaqstan oblysy rámizder alańyn, Qyzylorda oblysy «Anaǵa taǵzym» ortalyǵyn, Batys Qazaqstan oblysy jelilik saıabaqty, Atyraý oblysy «Abaı álemi» ortalyǵyn, Shyǵys Qazaqstan oblysy Ertis jaǵajaıyn abattandyrýdy josparlap otyr. Sondaı-aq oblys ákimdigi men «Samuryq qazyna» ál aýqat qorynyń birlesýimen jaqynda qalada dene shynyqtyrý saýyqtyrý kesheniniń qurylysy bastaldy.
