Is-shara Mańǵystaý oblysynyń Mádenıet, tilderdi damytý jáne arhıv isi basqarmasynyń tapsyrysy boıynsha, Biryńǵaı grant operatory – Azamattyq bastamalardy qoldaý ortalyǵynyń qoldaýymen jáne «Altyn Oımaq» qolónerdi qoldaý qoǵamdyq qorynyń uıymdastyrýymen «Mádenıet pen ónerdi damytý» jáne «Umytylmas óner» baǵyty aıasynda júzege asty.
Festıvaldiń basty maqsaty – ulttyq mádenıet pen dástúrli qolónerdi nasıhattaý, sheberler arasyndaǵy tájirıbe almasýdy damytý, jas urpaqty ulttyq rýhta tárbıeleý jáne qazaqtyń qolónerin jańǵyrtýǵa úles qosý boldy.
Is-sharaǵa qala turǵyndary men qonaqtary, jastar, kolledj stýdentteri, mádenıet basqarmasy men murajaı ókilderi, memlekettik organdar, buqaralyq aqparat quraldary, úkimettik emes uıymdar jáne qolóner sheberleri qatysty.
Festıval baǵdarlamasynda kıiz úıdi tigý jáne jyǵý prosesin kórsetý, ulttyq qolóner kórmesi, sángerler men zergerlerdiń jumystaryn tanystyrý, sheberlik sabaqtary, sondaı-aq jastarǵa arnalǵan tanymdyq is-sharalar uıymdastyryldy.
Jarys qorytyndysynda úzdikter «Eń jaqsy júnnen jasalǵan buıym», «Eń úzdik toqyma buıymy», «Eń jaqsy aǵash buıymy»,«Eń jaqsy zergerlik buıym», «Eń jaqsy keramıkalyq buıym», «Eń jaqsy shı», «Eń jaqsy kádesyı», «Eń jaqsy dástúrli qazaq kestesi» nomınasııalary boıynsha anyqtaldy.
