Ulttyq ulannyń baspasóz qyzmeti habarlaǵandaı, ortalyqtyń oqý baǵdarlamasynda taktıkalyq daıyndyq, tótenshe jaǵdaılardy joıý, ushqyshsyz ushý apparattary qoldaný, fızıkalyq jáne kompıýterlik qaýipsizdik júıelerin meńgerý, radıasııalyq, hımııalyq jáne bıologııalyq qorǵaý daıyndyǵyn jetildirý máseleleri qamtylǵan.
Bas qolbasshy tájirıbelik sabaq ótkizýge arnalǵan oryndardy kórdi. Daǵdarysqa qarsy oqý ortalyǵynyń qyzmetkerleri qazirgi zamanǵy dron jáne antıdron júıelerin úıretý ádistemelerimen tanystyrdy.
Budan bólek A. Baltabekov «Shyǵys» óńirlik qolbasshylyǵyna qarasty áskerı bólimderdi aralady.
Atap aıtqanda, qoǵamdyq tártipti qamtamasyz etý boıynsha jedel maqsattaǵy 5518 áskerı bóliminiń, Memlekettik mańyzdy nysandardy kúzetetin 3477 áskerı bólimi komandatýralarynyń qyzmet barysyn tekserdi.
Sondaı-aq túzeý mekemelerin kúzetetin 6699 áskerı bóliminiń tynys-tishiligimen tanysty.
Ár áskerı bólimniń jaǵdaıymen tanysqan soń, general-maıor Ańsaǵan Baltabekov óńirlik qolbasshylyqqa qyzmetti uıymdastyrý isin odan ári jetildirýdi, onyń qaýipsizdigi men sapasyn zamanaýı tehnologııalar men jasandy ıntellektini paıdalaný arqyly qamtamasyz etýdi tapsyrdy.
