Foto: egemen.kz/Erlan Omar
Qujat Memleket basshysynyń tapsyrmasy boıynsha Bıýdjet kodeksiniń talaptaryna sáıkes ázirlengen.
Sondaı-aq 2026-2028 jyldarǵa arnalǵan respýblıkalyq jáne oblystyq bıýdjetter, respýblıkalyq mańyzy bar qalalar men astana bıýdjetteri arasyndaǵy jalpy sıpattaǵy transfertterdiń kólemi týraly zań qabyldandy. Jergilikti bıýdjetterdiń kiristeriniń boljamy jańa Bıýdjet jáne Salyq kodeksteriniń qoldanysqa engiziletini eskerile otyryp qalyptastyryldy.
Kirister 2026 jyly 19,2 trln teńge, 2027 jyly 21,2 trln teńge, 2028 jyly 23,2 trln teńge bolady dep boljanyp otyr. Shyǵyndar, sáıkesinshe, 27,7 trln, 28,7 trln jáne 29,7 trln teńge bolmaq.
Ulttyq qordan kepildendirilgen transfert jyl saıyn shamamen 2,8 trıllıon teńgeni quraıdy. Bıýdjet saıasatynyń negizgi basymdyǵy memlekettik áleýmettik mindettemelerdi tolyq jáne ýaqytyly oryndaý, sondaı-aq ǵylym, bilim berý jáne medısınany qoldaýdy arttyrý arqyly adamı kapıtaldy damytý bolyp qala beredi. Sondaı-aq zań jobasyn qaraý barysynda depýtattar óńirlerdi damytýda bıýdjettik shyǵyndardy ulǵaıtýdy kózdeıtin túzetýler usyndy. Bul maqsattarǵa Úkimet rezervinen qosymsha 30 mıllıard teńge jáne memlekettik qaryzǵa qyzmet kórsetý esebinen 16,5 mıllıard teńge qarastyryldy. Bul qarjy jylý, elektr, gaz, sýmen jabdyqtaýdy damytýǵa, jaǵalaýdy nyǵaıtý jumystaryna jáne basqa da salalarǵa baǵyttalady. Sonymen qatar ulttyq ekonomıkanyń básekege qabilettiligi men ornyqtylyǵyn qamtamasyz etý úshin zań jobasyna 1 trln teńgeni qaıta bólý boıynsha túzetýler engizildi. Qarjy mınıstrliginiń «Jańa bastamalarǵa arnalǵan shyǵystar» baǵdarlamasy boıynsha josparlanǵan shyǵyndar bıýdjet baǵdarlamalary ákimshileri arasynda bólingen. Bul qarajat keıinnen otandyq óndiristi damytýǵa, ónerkásiptik kásiporyndardy qoldaýǵa, eldiń azyq-túlik qaýipsizdigin nyǵaıtýǵa, agrarlyq sektordy tehnıkalyq jańǵyrtý arqyly eńbek ónimdiligin arttyrýǵa baǵyttalady.
