Memleket basshysy Qasym-Jomart Toqaev óz Joldaýynda ekonomıkany ártaraptandyrý men «jasyl» tehnologııalardy engizýdiń mańyzdylyǵyna erekshe toqtalǵan bolatyn. Bul mindetter elimizdiń ornyqty ekonomıkalyq damýyn qamtamasyz etýdiń negizgi tetikteriniń biri retinde aıqyndaldy. Búginde bul baǵyttaǵy bastamalardyń naqty júzege asý úlgisin «RG Brands Kazakhstan» kompanııasynyń qyzmetinen kórýge bolady.
1994 jyly qurylǵan RG Brands Kazakhstan búginde Qazaqstandaǵy sýsyndar, shyryndar, sút ónimderi men shaı óndirisiniń jetekshi kásiporyndarynyń biri sanalady. Kompanııa quramynda birneshe iri óndiristik nysandar jumys isteıdi: Almatydaǵy «Tealand» zaýyty, Qostanaı qalasyndaǵy «Kosmıs» kásiporny jáne Almaty oblysyndaǵy «Aqseńgir» óndiristik-logıstıkalyq kesheni. 2024 jyly bul tizimge taǵy bir mańyzdy joba – «Aqseńgir-2» zaýyty qosyldy. Investısııa kólemi 33 mıllıon AQSh dollarynan asqan bul joba Qazaqstannyń Damý Bankiniń qoldaýymen júzege asty. Bul Memleket basshysy qoıǵan strategııalyq maqsattardyń naqty oryndalyp jatqanyn kórsetetin aıqyn mysal.
«Eksporttyq baǵytta damý strategııasyn túsinetin senimdi seriktes tabý biz úshin asa mańyzdy boldy. Qazaqstannyń Damý Banki bizge tek qarjylyq kómek qana emes, keńes berý men júıeli qoldaý turǵysynan da úlken úles qosty. Sonyń arqasynda joba oıdaǵydaı júzege asyryldy», dedi RG Brands Basqarma tóraǵasy Tımýr Qaltaev.
Onyń aıtýynsha, búginde kásiporynda 600-ge jýyq adam turaqty jumyspen qamtylǵan. Sonymen qatar zaýyttyń qyzmeti óńirlik ekonomıkaǵa mýltıplıkatıvti áser etip, tasymaldaý, shıkizat jáne qaptama jetkizýmen aınalysatyn seriktes kompanııalardyń damýyna da oń yqpal etýde. Jobanyń basty artyqshylyqtarynyń biri – konservantsyz ónim shyǵarýǵa múmkindik beretin jańa ystyq quıý jelisi. Bul tehnologııa sýsyndardyń sapasyn jaqsartyp, saqtaý merzimin uzartady, sondaı-aq plastıkalyq bótelkelerdiń salmaǵyn azaıtý arqyly qorshaǵan ortaǵa túsetin ekologııalyq júktemeni tómendetýge septigin tıgizedi.
Aıta keteıik, Qazaqstannyń Damý Banki men RG Brands Kazakhstan arasyndaǵy seriktestik 2008 jyly bastaldy. Sol jyly Bank kompanııaǵa sýsyn shyǵaratyn jańa zaýytty salý úshin ınvestısııalyq nesıe berdi. Odan keıin 2016 jyly bank kompanııaǵa shıkizat pen qaptama satyp alýǵa arnalǵan qarjylandyrý usynǵan bolatyn. Al 2024 jyly eki tarap elimizdegi alǵashqy sındıkattalǵan nesıe kelisimine qol qoıdy. Jalpy kólemi 26,5 mlrd teńgeni quraǵan bul qarjynyń 12,5 mlrd teńgesi óndiristik qýattardy keńeıtýge, al 14 mlrd teńgesi eksport aldyndaǵy qarjylandyrýǵa baǵyttaldy. Nátıjesinde jańa óndiristik jeliler iske qosylyp, ónim shyǵarý men eksport kólemi edáýir artty.
«Bul joba bank mıssııasyna tolyq sáıkes keledi. Nátıjesinde óńirlik ekonomıka damyp, jańa jumys oryndary ashyldy, salyq túsimderi artty jáne eksporttyq áleýet kúsheıdi», dep atap ótti Qazaqstannyń Damý Banki klıenttermen jumys dıreksııasynyń aǵa bankıri Ásel Shıtenova. Onyń aıtýynsha bank aldaǵy ýaqytta da kompanııanyń aınalym qarajatyn tolyqtyrý, sondaı-aq tamaq ónerkásibindegi jańa óndiris jobalaryn iske asyrý baǵytynda qoldaý kórsetýge daıyn.
Qazir RG Brands Kazakhstan ónimderiniń shamamen 20 paıyzy Qyrǵyzstan, О́zbekstan, Reseı, Qytaı jáne Tájikstan naryqtaryna eksporttalady. Kompanııa ekologııalyq turaqtylyq qaǵıdattaryn berik ustana otyryp, óndiristik prosesterge «jasyl» tehnologııalardy belsendi túrde engizip keledi. Mysaly, sý men energııa resýrstaryn únemdeý, plastık qoldanýdy azaıtý jáne qaldyqsyz óndiristi damytý boıynsha júıeli jumys júrgizilýde.
RG Brands Kazakhstan tájirıbesi – memleket pen bıznestiń senimdi seriktestigi óndiristi jańǵyrtýǵa, otandyq ónim sapasyn arttyrýǵa jáne eldiń azyq-túlik qaýipsizdigin qamtamasyz etýge naqty úles qosa alatynyn kórsetetin aıqyn mysal. Qazaqstannyń Damý Banki qoldaý kórsetken bul joba elimizdiń eksporttyq áleýetin arttyryp qana qoımaı, ınnovasııalyq jáne ekologııalyq turǵydan tıimdi óndiristiń damýyna da tyń serpin berip otyr.
