Foto: Almaty qalasynyń ákimdigi
Beıbit Shahanovtyń aıtýynsha, Almatyda mádenıet salasynyń úsh mańyzdy nysanyna jóndeý jáne jańǵyrtý jumystary júrgizilip jatyr. Solardyń biri – «Raıymbek batyr» memorıaldyq kesheni.
«Bul jumys memorıaldy qalanyń jáne eldiń rýhanı, tarıhı jáne mádenı ómirinde strategııalyq mańyzy bar qazirgi zamanǵy mádenı-tarıhı jáne aǵartýshylyq ortalyqqa aınaldyrý maqsatynda júrgizilýde. Jóndeý aıaqtalǵan soń memorıal qoǵamdyq jáne rýhanı sharalar ótkizýge arnalǵan ashyq ári fýnksıonaldy alańǵa aınalady», dedi Beıbit Shahanov.
Sonymen qatar bıyl naýryz aıynda N.Sas atyndaǵy balalar men jasóspirimder teatrynyń keshendi jańǵyrtý jumystary bastalǵan. Teatrdyń tarıhı kelbeti saqtalyp, ǵımaratqa zamanaýı ınjenerlik sheshimder engizilmek. Jańarǵan teatrda 226 kórermenge arnalǵan oryn bolady, bul onyń syıymdylyǵyn edáýir arttyrady.
Sondaı-aq Qazaqstan Jazýshylar odaǵy ǵımaratynyń jóndeý jumystary aıaqtalýǵa jaqyn. Jobany 2026 jyldyń basynda aıaqtaý josparlanǵan. Jańartylǵan keńistik ulttyq ádebıetti damytýǵa, mádenı biregeılikti nyǵaıtýǵa jáne ádebı-aǵartýshylyq bastamalardy qoldaýǵa arnalǵan ortaǵa aınalady.
Qalada úsh jańa mádenı nysannyń – Jastar teatry, Sırk jáne Zoobaqtyń jobalyq jumystary júrgizilip jatyr. Jastar teatrynyń qurylysy 2026 jyldyń naýryz aıynda bastalmaq.
Mádenıetpen qatar, sport ınfraqurylymyn damytý da basym baǵyttardyń biri. Ákim orynbasarynyń sózinshe, Almaty elimizdiń sport kadrlaryn daıarlaıtyn basty ortalyqtardyń biri sanalady.
«Bıyl Naýryzbaı jáne Túrksib aýdandarynda olımpıadalyq basseınderi bar eki jańa dene shynyqtyrý-saýyqtyrý kesheniniń qurylysyn bastaýdy josparlap otyrmyz. Kelesi jyly taǵy tórt sport kesheniniń qurylysy Saıaly, Aqjar, Qarasý jáne Shuǵyla shaǵynaýdandarynda bastalady», dedi ol.
Qalanyń sporttyq ómirindegi mańyzdy jobalardyń biri – 35 myń kórermenge arnalǵan jańa fýtbol stadıonynyń qurylysy. Nysan UEFA-nyń 4-sanat standartyna tolyq saı bolmaq.
Budan bólek, Almatynyń basty sporttyq nysandarynyń biri – «Medeý» muz aıdyny kesheni de jańartylyp jatyr. Eki jylǵa josparlanǵan bul joba aıasynda keshen óziniń halyqaralyq sporttyq-týrıstik mártebesin saqtap, kelýshiler úshin odan ári tartymdy bolmaq.
