Osylaısha, saıysqa erekshe bilimge múddeli mektep oqýshylary qatysty. Mundaǵy maqsat – ınklıýzııalyq mádenı-sporttyq is-sharalar arqyly dostyq baılanysty, áleýmettik belsendilikti, ózara syılastyqty nyǵaıtý.
«AMANAT» partııasy Almaty oblystyq fılıalynyń atqarýshy hatshysynyń orynbasary Aslan Kóbentaevtyń aıtýynsha, mundaı is-shara óńirde úshinshi ret ótkizilýde.
«Partııanyń bastamasymen úshinshi jyl qatarynan «Teń múmkindikter» atty ınklıýzıvti sport festıvali ótkizilip keledi. Bul – «Kedergisiz keleshek» atty partııalyq jobamyzdyń mańyzdy bóligi. Búgingi is-sharaǵa oblystyń túkpir-túkpirinen 50-ge jýyq jasóspirim jınaldy. Balalar bochcha, jeńil atletıka, estafeta syndy sport túrleri boıynsha óner kórsetti. Talapshyl, jigerli balalar bárimizdi tánti etti», dedi ol.
Jeńimpazdar dıplomdarmen jáne baǵaly syılyqtarmen marapattaldy. Komandalyq esep boıynsha Eńbekshiqazaq aýdany 1-oryn, Qarasaı aýdany 2-oryn, al Ile aýdany 3-oryn ıelendi. Nátıjesinde respýblıkalyq kezeńge 18 oqýshy joldama aldy.
Aıta keteıik, erekshe qajettiligi bar adamdarǵa qoldaý kórsetý – «AMANAT» partııasy atqaratyn jumystaǵy negizgi basymdyqtyń biri. Máselen, partııanyń «Halyqpen birge!» saılaýaldy baǵdarlamasyn júzege asyrý jumysy aıasynda 2028 jylǵa deıin árbir eldi mekende ınklıýzııany qoldaýdyń keminde bir kabınetin ashý kózdelgen.
