Foto: Instagram/f.c.kairat
22 jastaǵy Temirlan Anarbekov «Qaırattyń» sapynda Chempıondar lıgasyndaǵy alǵashqy oıynynda-aq jankúıerlerdiń senimin tolyq aqtady. Kıprdiń «Pafos» klýbyna qarsy ótken kezdesýde ol qarsylastardyń bes qaýipti soqqysyn sátti toıtaryp, qaqpasyn saqtap qaldy. Nátıjesinde match 0:0 esebimen aıaqtalyp, Anarbekov komandanyń úzdik oıynshysy atandy.
Sofascore platformasy qazaqstandyq qaqpashynyń bul jetistigin erekshe atap ótti. Resmı jazbada onyń jaraqattan keıin alańǵa alǵash ret shyqqany jáne birden tarıhı nátıjege qol jetkizgeni aıtylǵan. Osylaısha, Temirlan Chempıondar lıgasynyń tarıhynda eń joǵary – 10 ball alǵan bar bolǵany úshinshi qaqpashy retinde tirkeldi.
Aıta keteıik, halyqaralyq deńgeıdegi sporttyq baǵalaý júıesi sanalatyn Sofascore fýtbolshylardyń kórsetkishterin naqty derekter negizinde esepteıdi.
