Bıyl jobaǵa 2 myńnan astam jas qatysqan. Olar úsh aı boıy qalany kógaldandyrý, aǵash otyrǵyzý, kóshe men saıabaqty abattandyrý jáne tazartý jumysymen aınalysty. Maýsym qorytyndysy boıynsha Almatynyń qalalyq shtaby respýblıka boıynsha eń úzdikter qatarynan tabyldy.
«Bul jaı ǵana jazǵy jumys emes, myńdaǵan almatylyq jastyń eńbektiń qadirin túsinýine, Otanǵa qyzmet etý rýhyn sezinýine yqpal etken mańyzdy bastama. Bıyl biz Almaty qalasyndaǵy joǵary oqý oryndary men kolledjderdiń 2 100 stýdentin maýsymdyq jumyspen qamtydyq. Jasyl belsendiler kún saıyn tańǵy mezgilden bastap eńbek etip, qalamyzdyń damýyna úles qosty. Buǵan dálel – Almaty qalasynyń «Jasyl el» shtabynyń respýblıka boıynsha úzdik dep tanylýy. Osyndaı ónimdi eńbek jastarǵa jaýapkershilik, tártip jáne komandalyq jumystyń qundylyqtaryn darytady», – dedi Almaty qalasy Jastar saıasaty basqarmasynyń basshysy Azız Qajdenbek.
Uıymdastyrýshylardyń pikirinshe, mundaı bastamalar tabıǵatty jaqsartýǵa ǵana emes, jas urpaqtyń ekologııalyq mádenıetin arttyrýǵa yqpal etedi. Maýsymnyń jabylýynda úzdik shyqqan 20 jasqa estelik syılyqtar tabys etildi.
ALMATY
