Aqtaýdaǵy «Aq Nek» zaýyty jańa sýsyn óndirmekshi

AQTAÝ. 7 tamyz. Aqtaýdaǵy «Aq Nek» zaýyty jańa sýsyn óndirmekshi. Bul týraly egemen.kz tilshisi habarlady. 1997 jyldan beri Mańǵystaý óńirinde azyq-túlik, sút ónimderin óndirýmen jáne túrli mekemelerge servıstik qyzmet kórsetýmen aınalysyp kele jatqan «Bereket-F» JShS-ne qarasty «Aq Nek» zaýytynyń óndiristik qýaty men taýar kólemi jyldan-jylǵa artyp keledi. Budan 2 jyl buryn taýardyń 15 túrin óndiretin zaýytta qazir 40 túrli taýar daıyndalady. Olardyń arasynda pasterlengen sút, qurt, aıran, súzbe, qatyq, irimshik, maılylyq deńgeıi ártúrli qaımaqtar tutynýshylardyń talǵamyna tatyp, suranysyna ıe bolǵan. Endi «Aq Nek» zaýyty óz tutynýshylaryn «Tań» atty sýsynymen qýantpaqshy. Táýligine 15 tonna qýattylyqpen jumys jasaıtyn zaýyt atalǵan ónimdi Belarýs elinen ákelingen qurǵaq sútti qalpyna keltirý, sút ónimderin ashytý arqyly daıyndaıdy. О́ńdeý ónerkásibindegi shaǵyn jáne orta kásipkerlik nysandaryn qoldaý baǵdarlamasynyń qatysýshysy bolyp tabylatyn «Aq Nek» zaýytynyń bul jobasy «Qazaqstannyń Halyq banki» AQ tarapynan qarjylandyrylǵan. Baǵdarlama 10 jylǵa deıingi uzaq merzimge nesıeni 6%-ben alýǵa múmkindik berse, ol óz kezeginde kásipkerdiń zaýyt qyzmetiniń negizgi artyqshylyǵy bolyp tabylatyn taýar óniminiń baǵasyn tómen qoıýǵa jol ashady. «Bıznestiń jol kartasy-2020» baǵdarlamasy men «Damý» kásipkerlikti qoldaý ortalyǵynyń demeýimen óz jumysyn nyǵaıta túsken zaýyt ótken jyly qaımaq, aıran túrlerin ydysqa quıyp, qaptaýdy avtomatty túrde oryndaýǵa qol jetkizgen. Sapaly ónim shyǵarýdy maqsat etken zaýyttyń is-tájirıbesi men qupııasyn bilýge qyzyǵýshylar kóp. Zaýyt aldaǵy ýaqytta kórshi elderdiń naryǵyna shyǵýdy josparlap otyr. Gúlaıym Shyntemirqyzy. Derek: egemen.kz. Sýret: tumba.kz.