О́tken ǵasyrdyń 60-jyldary Torǵaıda Amangeldi atyndaǵy memorıaldyq mýzeı jumys istep turǵan. Ony halyq aqyny Nurhan Ahmetbekovten keıin belgili etnograf-ǵalym Seıit Kenjeahmetuly basqarady. Birde mýzeıdi tekserýge Qostanaıdan arnaıy kelgen jatjurttyq sheneýnik murajaı jádigerleriniń birazyn joıý kerek degen sheshim shyǵarady. Ábilhan Qasteev salǵan Amangeldi portreti de «jaramsyz» jádigerlerdiń tizimine iligedi.
Sol kezde mýzeıdi basqaryp turǵan Seıit aǵamyz oblystan kelgen ýákildi úıine túsirip, jaqsylap qonaq qyp kútip, jyly tósegine jatqyzady. Kesir meıman ábden qorylǵa basqanda, tún jamylyp otyryp ózi basqaryp otyrǵan murajaıǵa ózi «urlyqqa» túsedi. Munyń aldynda ǵana mýzeı ǵımaraty bıik qorshaýmen qorshalǵan eken, sodan sekirip túsip, batyrdyń portretin alyp shyǵady da, úıine ákelip tyǵyp qoıady. Kelesi kúni 1916 jylǵy ult-azattyq kóterilisine qatysty kóptegen qundy qujat, kóterilisshilerdiń sýreti túgeldeı otqa oranyp órtenip, kúlge aınalady.
Keıin Arqalyqta «Dala ólkesi tarıhy» mýzeıi ashylǵanda Seıit aǵamyz portretti О́zbekáli Jánibekovtiń qolyna tapsyryp, qundy jádigerdiń jaı-japsaryn aıtyp bergen.
Murajaı qorynda budan ózge Ábilhan Qasteev salǵan Amangeldiniń aıaqtalmaı qalǵan taǵy bir portreti, batyr alǵash kóterilis basshylarynyń basyn qosyp, keńes ótkizgen sardar shtabynyń sýreti saqtaýly tur.
Qostanaı oblysy
