Foto: Aqorda
Qasym-Jomart Toqaev óz sózinde básekege qabiletti el bolý úshin, eń aldymen, bilim-ǵylymdy damytý qajet ekenin aıryqsha atap ótti.
«Qazaqstan – Konstıtýsııa boıynsha áleýmettik memleket. Sondyqtan biz osy jaýapty, qurmetti mıssııany mindetti túrde oryndaımyz. Áleýmettik strategııamyz tıimdi, ádiletti bolýy kerek. «Ulttyq qor – balalarǵa» baǵdarlamasyn júzege asyryp jatyrmyz. Bul óskeleń urpaq úshin jasalǵan úlken qadam. Biz ozyq oıly ult bolýymyz kerek. Básekege qabiletti el bolý úshin, eń aldymen, bilim-ǵylymdy damytý qajet. Sondyqtan bes jylda bilim berý salasyna bólinetin qarjyny úsh ese arttyrdyq. Ustazdardyń jalaqysyn eki ese ulǵaıttyq. Qazirgi tańda qoǵamymyzda muǵalim mamandyǵynyń mártebesi anaǵurlym kóterildi. 1200 jańa mektep ashtyq. Sonyń ishinde «Keleshek mektepteri» ulttyq jobasy aıasynda kóptegen bilim ordasy boı kóterdi. Ulttyq ǵylymdy qoldaýǵa da mán berip otyrmyz. Bul salaǵa salynǵan qarajat bes jylda 5 ese ósti. Sheteldiń 33 bedeldi ýnıversıtetteriniń fılıaly ashyldy. Sondaı-aq ult saýlyǵyn jaqsartý úshin júıeli sharalar qabyldandy. 2020 jyldan beri medısına salasyna bólinetin qarjy 3 ese artty. 927 medısına nysany ashyldy. Elimizdegi ortasha ómir súrý uzaqtyǵy 75 jastan asty», dedi Q.Toqaev.
