Bul – ákelerimiz syılaǵan beıbit ómir

Uly Jeńis kúni – bárimiz úshin aıryqsha mereke. Bul kún – surapyl soǵys­ta janqııarlyqpen erlik kórsetken, eli úshin janyn qurban etken babalar rýhyna taǵzym etýdiń, qııan-keski urystan aman kelgen ata-anamyzdy qurmetteýdiń naǵyz úlgisi kórsetiletin uly kún. Bul mereıli mereke mańyzy bizdiń Tasmaǵambetovter áýleti úshin de aıryq­sha. Soǵysty biz kózben kórmesek te, jeńis­tiń qadirin, soǵystan aman oralýdyń artyqshylyǵyn jaqsy bilemiz. Sebebi, bizdiń ákemiz Turaq Tasmaǵambetov – qan maıdanda qaısarlyqpen urysqan has batyr, Uly Otan soǵysynyń ardageri. Ol soǵystan keıingi qalpyna keltirý kezeńderinde de eli úshin baryn salyp eńbek etti. Onyń ónegeli ǵumyry, bizge bergen tálim-tárbıesi ósıet pen qasıetke toly bolatyn. Ákemiz 9 mamyr – Jeńis kúnin erekshe baǵalaıtyn, ol kúnniń ereksheligin, beıbit ómirdiń qadirin ákemizdiń áńgimelerinen sanamyzǵa sińirip óstik. Al bıyl búkil el bolyp Jeńistiń jetpis jyldyǵyn atap ótip otyrmyz. Bul kúnderi aramyzda ákemiz joq bolsa da, onyń bizge syılaǵan Jeńisi, beıbit ómiri bar! Osy sebepten de shyǵar, Jeńis kúni kelgen saıyn biz jylda ákemizdi erekshe qurmetpen eske alamyz. Turaq Tasmaǵambetov Aqtóbe oblysy, Klıýchevoı aýdany, Myrzaly aýylynda 1912 jyly týǵan. 1934 jylǵa deıin bastaýysh mektepte muǵalim bolyp istegen. Odan keıin 1938 jyly Qostanaıdaǵy pedtehnıkýmdy bitiripti. 1942 jylǵa deıin Torǵaı aýdanynyń Shıli, Aqsýat ortalaý mektepterinde muǵalim jáne basqarýshy bolyp istegen. Al 1942-1944 jyldar araly­ǵynda Uly Otan soǵysyna qatys­ty. Stalıngrad maıdanynda 112-shi atqyshtar polkinde aýyr ja­ralanyp, II toptaǵy múgedek bo­lyp elge oralǵan. Uly Otan soǵy­synyń qatysýshysy retinde Jeńis­tiń, sondaı-aq, KSRO Qarýly Kúsh­teriniń aıtýly jyldarynda me­rekelik belgi-medaldarmen marapattalǵan. Ákemiz soǵys aıaqtalǵan soń, ómi­riniń sońyna deıin ustazdyq qyz­mette boldy. Muǵalim, mektep dırektory, balalar úıiniń dırektory syndy jaýapty jumys­tardy atqardy. Ákemiz 1989 jyly dúnıe saldy. Shúkir, artynda ónip-ósken urpaǵy qaldy. Ol kezinde: «Senderdiń bul dúnıe jaryǵyn kórýge birden-bir sebepshi, qasymda bolǵan maıdanger Arkadıı Aleksandrovıch Fedotov degen dosym», deıtin. Iаǵnı, ol bolmasa, men tiri qalmas edim, sender ómirge kelmes edińder de­geni ǵoı. Stalıngrad maıdanynda jaralanǵanda álgi orys dosy saı­ǵa súırep túsirip, sodan aman alyp qalypty. Sol urysta ekeýi de ja­raqattanǵan. Ol kisiniń soǵys týraly aıtqan áńgimeleriniń bári esimde. Qazirgi kúni meniń jasym da jetpiske jaqyndap qaldy. Árıne, bul estelikpen áke aldyndaǵy paryzymdy óteı almasym anyq. Biraq nege ekenin bilmeımin, ákemiz týraly gazet betinde jazyp qaldyrsaq degen oı kókeıde kópten júrgen edi. Sony kóp oılap, osy jetpis jyldyq qarsańynda oryndaýdy ózime paryz sanadym. Ákemizdiń kózi tirisinde Jeńis kúni biz úshin erekshe úlken toı bolatyn. Qazan asylyp, dastarqan jaıylatyn. Aýyldaǵy soǵys arda­gerlerine úlken qurmet kórsetiletin. Qudaıǵa shúkir, qazirgi kúni de bul dástúr jalǵasyn taýyp, el bolyp, búkil respýblıka bolyp Jeńis kúnin erekshe atap ótip júrmiz. Laıym, toı kóp bolsyn. Elimiz tynysh, jurtymyz aman bolsyn!   Ábdirahman TASMAǴAMBETOV, zeınetker.  Aqmola oblysy.