Sýret: halyqline.kz
Dúbirli doda aldyndaǵy baspasóz jıynynda Týrızm jáne sport vıse-mınıstri Serik Jarasbaev, NOMAD akademııasynyń dırektory Rýslan Jetibaev, álem chempıonatynyń kúmis júldegeri, London jazǵy Olımpıadasynyń kúmis júldegeri, jazǵy Azııa oıyndarynyń bes dúrkin júldegeri, ońtústikkoreıalyq Djý Se Hýk, Ústel tennısi federasııasynyń vıse-prezıdenti Elsııar Qanaǵatov qatysty. 29 qazanǵa deıin jalǵasatyn halyqaralyq saıys Astanadaǵy «Beeline Arena» kesheninde ótedi. NOMAD akademııasynyń dırektory Rýslan Jetibaev bul saıysty jyl saıyn uıymdastyrýǵa yqylasty ekenin ańǵartty.
«Prezıdent kýbogi elimizdiń sporttyq brendine aınalyp keledi, munda jas talanttar men dańqty tennısshiler tartysqa túsedi. Bul – jarys qana emes, osy sport túrin damytý men halyqaralyq sporttyq yntymaqtastyqty nyǵaıtýdyń bastaýy», deıdi týrnırdi uıymdastyrýshy.
Halyqaralyq týrnırge 14 elden 300-den astam sportshy qatysady. Olardyń qatarynda Ońtústik Koreıa, Qytaı, Majarstan, Mysyr, Malaızııa, Iran, Saýd Arabııasy syndy elderdiń de tennısshileri bar. Elimizdiń sportshylary da júldeden úmitti. Týrnırge álemdik ITTF reıtıngindegi úzdikterdiń qatysýy dodanyń bási joǵary ekenin ańǵartady. Jalpy júlde qory – 115 000 AQSh dollary.
Áıgili sportshy Djý Se Hýk qazaq eliniń qonaqjaılyǵyna alǵysyn jaýdyryp, elimizde ústel tennısiniń qarqyndy damyp jatqanyna razylyǵyn jetkizdi. Tájirıbesimen bólisip, sheberlik saǵatyn ótkizýge yqylasty ekenin de málim etti.
Prezıdent kýbogi aıasynda álemdik ústel tennısi juldyzdarynyń qatysýymen shoý-match ta ótedi. Oǵan sport ańyzdary, álemniń eks-birinshi raketkasy – Sıýı Sın (Qytaı) men onyń jerlesi, álem chempıonatynyń kúmis júldegeri Fan Bo, álem chempıony, Eýropa chempıonattarynyń birneshe dúrkin júldegeri Verner Shlager (Aýstrııa), sondaı-aq Djý Se Hýk (Koreıa) syndy sańlaqtar qatysyp, sheberligin kórsetedi.
«2027 jyly ústel tennısinen álem chempıonaty bizdiń elde ótedi. Sondyqtan mundaı deńgeıdegi iri jarysty uıymdastyrý tájirıbemizdi shyńdaýymyzǵa septigin tıgizedi. Bul halyqaralyq týrnır álemdik dodaǵa daıyndyq retinde uıymdastyrylyp otyr. Halyqaralyq dodada sportshylarymyzdyń qarymyn da baıqaımyz», dedi S.Jarasbaev baspasóz máslıhatynda.
Tórt jas sanatynda hám komandalyq saıysta Kırıll Gerasımenko, Alan Qurmanǵalıev, Aıdos Kenjeǵulov, Iskander Harkı, Záýresh Aqasheva, Sarvınoz Mırkadırova, Janerke Kóshkimbaeva, Ánel Baqytqa senim artylady.
Prezıdent kýbogi týrnıri sport mádenıetin damytýǵa, jastar arasynda ústel tennısin nasıhattap, halyqaralyq yntymaqtastyqty nyǵaıtý maqsatynda uıymdastyrylyp otyr.
