Foto: inbusiness.kz
Erlan Aqkenjenov elimizdiń energetıkalyq júıesi tıisti talaptarǵa saı jáne Reseı men Ortalyq Azııa elderiniń energetıkalyq júıelerimen úılesimdi qalypta jumys istep turǵanyn atap ótti.
Qazir Qazaqstanda 237 elektr stansasy jumys istep tur. Onyń 79-y dástúrli generasııa kózderi, qalǵan 158-i jańartylatyn energııa kózderinen turady.
«Mınıstrlik energetıkalyq qaýipsizdikti nyǵaıtýǵa, ınfraqurylymdy jańǵyrtýǵa, qýattardy keńeıtýge jáne sıfrlyq sheshimderdi engizýge baǵyttalǵan sharalardy turaqty negizde qabyldap keledi», dedi Erlan Aqkenjenov.
Mınıstr 26 GVt-tan astam jańa qýat kózderin qosý qarastyrylyp otyrǵan «Energetıka salasyn 2035 jylǵa deıingi damytý jospary» aıasyndaǵy jumystar qarqyndy túrde jalǵasyp jatqanyn aıtty. Jańa qýat kózderin iske qosý qoldanystaǵy stansalardy jańǵyrtý jáne jańa qýat óndirý qondyrǵylaryn salý arqyly júzege asyrylady.
Energetıka salasyn sıfrlandyrý máselesi de nazarǵa alynǵan. Erlan Aqkenjenov qazirgi ýaqytta «Otyn-energetıka keshenin biryńǵaı memlekettik basqarý júıesi» (EnergyTech) atty salalyq platformany iske qosý josparlanyp otyrǵanyna toqtaldy.
«EnergyTech platformasy otyn-energetıka kesheniniń barlyq salasyn bir platforma bazasyna biriktiredi. Ol energetıka sektory, ken paıdalaný jáne qaıta óńdeýden bastap kómir ónerkásibine deıingi OEK-tiń 10 negizgi baǵyty boıynsha basqarý prosesterin keshendi úılestirýdi qamtamasyz etedi. Júıeni tolyq kólemde jasap shyǵaryp, ónerkásiptik deńgeıde qoldanysqa engizý 2026–2027 jyldarǵa josparlanyp otyr», dedi Erlan Aqkenjenov.
Energetıka mınıstri bıyl 7 sıfrlyq servıs paıdalanýǵa berilip, onyń ishinde 2 servıs energetıka sektorynda júzege asyrylǵanyn atap ótti.
Olar: Kúzgi-qysqy kezeńge daıyndyq pen onyń ótý barysyn monıtorıngteýge arnalǵan sıfrlyq servıs;
Shekti tarıfti bekitýge arnalǵan sıfrlyq servıs.
