Foto: parlam.kz
Senat Tóraǵasynyń aıtýynsha, Parlamenttiń ókilettigin arttyrý – demokratııalyq damý jolyndaǵy mańyzdy ári jaýapty qadam. Máýlen Áshimbaev reformalar josparly túrde, jan-jaqty jáne egjeı-tegjeıli talqylanatynyn atap ótti.
«Qazir zańdar eki Palatada qaralady: aldymen Májiliste qaralady jáne qabyldanady, odan keıin Senatta maquldanady. Osylaısha, bizde zań shyǵarý prosesi eki bólikten turady. Májilis, atap aıtqanda, Premer-Mınıstrdi taǵaıyndaýǵa kelisim beredi, mınıstrlerdiń kandıdatýralaryn talqylaıdy, Úkimet múshelerin qaraıdy. Senattyń da belgili bir ókilettikteri bar. Osy fýnksııalardyń barlyǵyn biriktirý Parlamenttiń kúsheıýine yqpal etedi jáne ókildi organdy jańa deńgeıge kóteretin bolady. Bul álemdik tájirıbe boıynsha ótetin úderis bizdiń elimizdiń demokratııa jolyndaǵy senimdi qadamy bolmaq», dedi M.Áshimbaev.
Sonymen qatar Máýlen Áshimbaev Prezıdent bul máseleni asyqpaı jáne jan-jaqty qaraýdy tapsyrǵanyn atap ótti.
«Barlyq sheshimder aqylǵa qonymdy, júıeli túrde qabyldanýy tıis. Bul úlken quqyqtyq reforma. Onyń túpki maqsaty – jan-jaqty oılastyrylǵan, pysyqtalǵan jalpy sheshimge kelý. Bul Parlamenttiń kúsheıe túskenin kórsetedi. Al ókildi organnyń kúsheıýi halyqtyń óz quqyqtaryn júzege asyrý úshin kóbirek múmkindik alatynyn bildiredi. Sondyqtan bul reformalar demokratııalyq progresti damytýǵa jáne elimizdi nyǵaıtýǵa óz úlesin qosatynyna senimdimin», dedi Palata Tóraǵasy Máýlen Áshimbaev.
