Oqýshynyń bul jobaǵa kelýine ult zııalysynyń kópshilikke beımálim qyrlary sebep bolǵan.
«Máshhúr Júsipti biz kóbine etnograf, tarıhshy retinde tanımyz. Al men eńbekterin hımııa, geografııa, bıologııa turǵysynan qarastyrdym. Ol eńbekteriniń birinde sýdyń tabıǵı aınalymy men býdan sý alýdyń joldaryn jazǵan. Men osy ıdeıany zamanaýı tehnologııamen ushtastyryp, tájirıbe júzinde dáleldedim. Tumannan taza sý alýǵa bolatynyn kórsettim», deıdi jas zertteýshi.
Mektep oqýshysy teńiz jaǵalaýynda ornalasqan Mańǵystaý óńirinde tuman jıi túsetinin, al onyń quramyndaǵy ylǵaldylyq 90 paıyzǵa deıin jetetinin atap ótti. Osy tabıǵı erekshelikti tıimdi paıdalaný arqyly aýadan taza sý alý ádisin usynǵan. «Men bul jobany jergilikti ákimdikke usynǵym keledi. О́ńirde sý tapshylyǵy ózekti. Eger tumannan sý jınaý júıesin ornatsaq, bul aýyl sharýashylyǵy men turmystyq qajettilikterge paıdaly bolar edi», deıdi Erjan.
Jas ǵalymnyń ǵylymı jetekshisi, qazaq tili men ádebıeti pániniń muǵalimi Aqjúnis Amalova oqýshysynyń eńbegin erekshe atap ótti.
«Máshhúr Júsip sýdyń qasıetteri men tabıǵı aınalymyn ǵylymı turǵydan sıpattaǵan. Biz Erjanmen birge osy oıdy tájirıbe arqyly dáleldeýdi maqsat ettik. Úıiniń mańyna tor ornatyp, túngi tuman kezinde sý tamshylarynyń jınalatynyn kórsettik. Keıin respýblıkalyq kezeńde aýa ylǵaldandyrǵysh arqyly bul úderisti tájirıbe júzinde dáleldep berdik», deıdi Aqjúnis Ospanqyzy.
Joba búginde Mańǵystaýdyń tabıǵı jaǵdaıyna beıimdelgen ekologııalyq bastama retinde qarastyrylyp otyr. Mundaı zertteý jumystary tek ǵylymı turǵyda ǵana emes, aımaqtaǵy sý tapshylyǵyn sheshýge úles qosatyn naqty qadam bolmaq.
Mańǵystaý oblysy
