Kórme Almaty qalasy ákimdiginiń, Qazaqstan Respýblıkasynyń Nıderland Koroldigindegi Elshiliginiń, Túrkııa Respýblıkasynyń Nıderland Koroldigindegi Elshiliginiń jáne Iýnýs Emre ınstıtýtynyń qoldaýymen uıymdastyrylǵan. Bul qazaq halqynyń baı mádenı murasyn pash etetin mańyzdy mádenı oqıǵa.
Bes taqyryptyq bólimnen turatyn ekspozısııa Almaty qalasy mýzeıler birlestiginiń qorynan alynǵan 70-ten astam biregeı jádigerdi usynady. Olardyń qatarynda qazaq halqynyń turmys-tirshiligi men dástúrlerinen syr shertetin etnografııalyq artefaktiler, sándik-qoldanbaly óner týyndylary, sondaı-aq qazaq jáne túrki halyqtarynyń mýzykalyq aspaptary bar.
«Almaty qalasy mýzeıler birlestigi sońǵy 3 jylda, Ońtústik Koreıa Avstrııa,Fransııa, Italııa, Chehııa, Serbııa, Majarstan , Túrkııa memleketterinde 11 halyqaralyq kórme uıymdastyryp, qazaq halqynyń tarıhy men mádenıetin álemdik deńgeıde tanystyryp keledi. Búgingi Amsterdamdaǵy kórme de – mýzeıdiń halyqaralyq baǵyttaǵy júıeli túrde júrgizilgen jumysynyń jalǵasy, qazaq mádenıetiniń Eýropa keńistigindegi jańa bir kórinisi», – deıdi Almaty qalasy mýzeıler birlestiginiń dırektory Lázzat Qudaıbergenqyzy.
Aıta keteıik, Qazaqstan Respýblıkasy men Nıderland Koroldigi arasyndaǵy dıplomatııalyq qatynas 1992 jyly 10 qyrkúıekte ornaǵan.
Iýnýs Emre ınstıtýtyndaǵy bul kórme 2025 jyly 14 qarashaǵa deıin jalǵasady.
