«Jolaýshylar tasymalynyń artýy men qalanyń keńeıýine baılanysty kelesi jyly 13 jańa baǵyt iske qosylady. Sonymen qatar Bus Line júıesin kezeń-kezeńimen engizip jatyrmyz. Avtobýstarǵa arnalǵan arnaıy jolaqtar qozǵalys ýaqytyn 25-30%-ǵa deıin qysqartady. Búginde osyndaı jolaqtar jalpy uzyndyǵy 134 shaqyrym bolatyn 30 ýchaskede jumys isteıdi. Bıyl taǵy úsh baǵytta — Táýelsizdik dańǵylynda, Amman kóshesinde jáne Qorǵaljyn tasjolynda engizildi. Al ótken jyly alty ýchaskede paıdalanýǵa berilgen bolatyn», – dedi ákim.
Jeńis Qasymbektiń aıtýynsha, qoǵamdyq kólik júıesin damytý – ákimdik jumysynyń basty basymdyqtarynyń biri.
«Jyl saıyn avtobýs sanyn orta eseppen 300–350 birlikke arttyryp, jańa baǵyttar men arnaıy jolaqtar ashyp kelemiz. Munyń bári qalalyq kólikti turǵyndar úshin tartymdy etýge baǵyttalǵan. Mysaly, 2024 jyly táýliktik jolaýshylar aǵyny 800 myń adam bolsa, 2025 jyly bul kórsetkish 1,1 mıllıonǵa jetti», – dedi qala basshysy.
Qazir Astanada toǵyz avtopark bar, onyń biri – kommýnaldyq. Qalǵan jeke avtoparkter de óz qarajaty esebinen kólik parkin jańartyp otyr. Bıyl olardyń esebinen 122 jańa avtobýs satyp alynǵan, bir bóligi qalaǵa jetkizildi.
«Qalalyq avtoparkterge bıyl 300 gazben júretin avtobýs jetkizý josparlanǵan. Onyń 134-i elordaǵa kelip úlgerdi. Sonymen birge ındýstrııalyq park aýmaǵynda avtomobıldik gaz toltyrý kompressorlyq stansııasy ornatylyp, iske qosyldy. Al jeke avtoparkter – “ABI-Astana”, “Elorda Trans” jáne “Jorǵa MT” – jańa avtobaza salyp jatyr», – dep atap ótti ákim.
