Keshe Premer-Mınıstrdiń orynbasary B. Saparbaev qyzylshaǵa qarsy ekpe jumystaryn, sonymen qatar Aqmola oblysynyń Kalachı aýylyndaǵy, Batys Qazaqstan oblysynyń Berezovka aýylyndaǵy jaǵdaılardy talqylaý boıynsha májilis ótkizdi, dep habarlady Premer-Mınıstrdiń baspasóz qyzmeti.
Májiliske ortalyq, jergilikti organdardyń jáne ǵylymı mekemelerdiń basshylary qatysty.
Májilis sońynda B.Saparbaev naqty birqatar tapsyrmalar berdi.
Atap aıtqanda, osy jylǵy qazan aıynan keıin aıqyndalǵan merzimde múddeli memlekettik organdarǵa qyzylshaǵa qarsy qosymsha ekpe jasalmaı turyp, bir aı buryn ımmýnızasııa sharalaryn ótkizýdi tapsyrdy. Osyǵan oraı, ústimizdegi jylǵy 1 maýsymǵa deıin ony daıyndaý boıynsha is-sharalar josparyn ázirlep, osydan buryn júrgizilgen ekpeniń qatelikterin joıý maqsatynda sharalar qabyldaý qajet.
Sondaı-aq, vıse-premer aldaǵy maýsymda keshendi ǵylymı-zertteýler nátıjesiniń negizinde Kalachı aýylynyń «uıqy» sındromynyń paıda bolýynyń shynaıy sebebin anyqtaýdy tapsyrdy. Sonymen qatar, aýyl turǵyndaryn oblystyń basqa eldi mekenderine kóshirý jumystaryn jalǵastyrý jáne olarǵa qajetti kómek kórsetý qajettiligi aıtyldy.
Sonymen birge, Premer-Mınıstrdiń orynbasary Batys Qazaqstan oblysynyń ákimdigine Berezovka aýylynda turaqty ekologııalyq monıtorıngtiń qamtamasyz etilýin jáne aýyl turǵyndaryn kóshirý, olardy jumyspen qamtý máselelerin pysyqtaýdy tapsyrdy.
Odan basqa, B. Saparbaev Qarashyǵanaq munaı-gaz kondensaty keninde sanıtarlyq-qorǵaý aımaǵyn keńeıtý qajettigin atap aıtty. Atalǵan joba Úkimetke 30 mamyrǵa deıin usynylýy qajet.
