Foto: qazdauiri.kz
Qazir elimizdiń sport ınfraqurylymymen qamtylý deńgeıi – 55,1 paıyz. Mınıstrlik kórsetkishti 2029 jylǵa qaraı 65 paıyzǵa jetkizýdi kózdep otyr.
Osy maqsatta bıylǵy 9 aıda 35 sport nysany paıdalanýǵa berilgen, jyl sońyna deıin taǵy 67 nysannyń qurylysyn aıaqtaý josparlanǵan.
Bul qatardaǵy iri jobalardyń tiziminde Túrkistan qalasyndaǵy halyqaralyq deńgeıdegi esý arnasy men Astanadaǵy Ulttyq sport ýnıversıteti bar. Ýnıversıtet bilim berý, ǵylymı jáne sporttyq baǵyttardy biriktirip, sala mamandaryn daıarlaý men zertteý jumystaryn júrgizetin mańyzdy ortalyqqa aınalmaq.
Jańa fýtbol alańdarynyń da qataryn qalyńdatý maqsaty qoıylǵan. Astanada 3 600 oryndyq stadıonnyń qurylysy qarqyn alǵan. Sonymen qatar óńirlerde taǵy 14 jańa stadıonǵa arnalǵan jobalyq-smetalyq qujattama ázirlengen.
«Infraqurylymnyń balalar men múmkindigi shekteýli azamattar úshin qoljetimdi bolýyna erekshe nazar aýdarylýda. Máselen, Oral qalasynda Freedom Shapaǵat qorynyń qoldaýymen zamanaýı sport zaly ashyldy. Al Aqtóbe men Taldyqorǵanda kúres zaldary, basseınder jáne fıtnes ortalyqtary bar jańa keshenderdiń qurylysy júrip jatyr. Elimizde sportqa beıim daryndy balalarǵa arnalǵan mamandandyrylǵan sport mektep-ınternattarynyń jelisi júıeli túrde damyp keledi. Qazirgi tańda osyndaı 14 oqý orny jumys isteıdi, aldaǵy ýaqytta olardyń sanyn barlyq óńirde arttyrý josparlanǵan», dedi Erbol Myrzabosynov.
Vedomstvo dereginshe, salaǵa bıýdjet qarajatynan bólek «Qazaqstan halqyna» qoǵamdyq qorynyń resýrstary da tartylyp otyr. Olardyń qoldaýymen aýyldyq jerlerde balalar men jasóspirimder sport mektepterin, sport keshenderi men modýldik zaldardy salýǵa baǵyttalǵan ondaǵan joba júzege asyrylyp jatyr.
