Astanada jumyssyzdyqqa jol joq

Astana qalasynyń ákimi Ádilbek Jaqsybekov ótkizgen kezekti apparattyq jınalys Memleket basshysynyń ótken aptada Úkimettiń keńeıtilgen otyrysy barysynda kún tártibine qoıǵan tapsyrmalaryn oryndaý máselesine arnaldy. Sonymen birge, otyrysta qalalyq kommýnaldyq qyzmet, kólik júıesi men densaýlyq saqtaý mekemeleriniń jumystary jan-jaqty talqylandy. Qazaqstan Úkimetiniń keńeıtilgen otyrysynda Elbasy Nursultan Nazarbaev «Jumys adamy úshin eń bas­tysy – óz jumys ornyn saqtap qalý. Adam úshin, onyń otbasy úshin bul barynsha mańyzdy», dep atap kórsetti. Osyǵan oraı qalalyq jınalysta Á.Jaqsybekov astanalyqtardyń jaqsy turmysy jáne elordanyń qarqyndy damýy úshin Memleket basshysynyń qoıǵan talaptary men tapsyrmalaryn oryndaýdyń mańyzdylyǵyn atap ótti. – Aldymyzda turǵan basty talap – ol elordanyń ekonomıkalyq ósimin saqtap qalý jáne turǵyndardy áleýmettik jaǵynan qoldaýdy kúsheıtý. Sondyqtan bıýdjettik qarjyny tıimdi paıdalaný jáne memlekettik organdardyń nátıjeli jumys jasaýy úshin bıýdjetti ońtaılandyrý boıynsha tez arada usynystar engizýdi tapsyramyn. Bul arada jumys istep jatqan jobalardy ıgerý isine basymdylyq berilýi kerek, – dedi qala ákimi. Apparattyq jınalysta basa mán berilgen másele – jumyssyzdyqty joıý. Á.Jaqsybekov barlyq qalalyq qyzmet túrlerine, elimizde eń tómengi kórsetkishterge ıe bolyp otyrǵan elordadaǵy jumyssyzdyqtyń tez arada aldyn alýǵa tapsyrma berdi. Ol úshin qala basshysy Astana qalasy jumyspen qamtý jáne áleýmettik baǵdarlamalar basqarmasyna arnaıy joba ázirlep, buqaralyq aqparat quraldarymen tyǵyz qarym-qatynas ornatýdy tapsyrdy. Qalalyq basqarmalardyń jumys deńgeıin aıta kele, Á.Jaqsybekov elordanyń kólik logıstıkasyndaǵy júıeli jumystardyń joqtyǵyn, qala turǵyndaryn aqparattandyrý isiniń sapasyzdyǵyn synǵa aldy. Máselen, qoǵamdyq kólikterdegi jolaqysynyń qalaı qalyptasatyny jaıyn­da tutynýshylardyń múlde beıhabar ekeni aıtyldy. Osyǵan baılanysty tıisti oryndarǵa jurtshylyq arasynda jan-jaqty túsinik jumystaryn júrgizý mindeti tapsyryldy. Sý tasqynyna qarsy sharalar men qalany qardan tazalaý jumystary da sóz boldy. – Kóktemgi sý tasqynyna qarsy sharalar belgilengen ýaqyt boıynsha júrgizilip jatqanyna qaramastan, jeke sektor aýmaǵynan qardy shyǵarýǵa bar kúshti jumsaý kerek, ásirese, jylda sý basý qaýpi tónetin aýdandardy basty nazarǵa alý kerek. Aýlalardy tazartýǵa kóp kóńil bólý qajet. Indýstrııalyq park pen JEO-2 aýmaqtarynda sýdyń kedergisiz, aǵýyn qamtamasyz etý úshin Esil, Aqbulaq, Sarybulaq ózenderiniń arnalaryn tazalaý kerek, – dedi elorda ákimi. Jıyn sońynda aýdandyq ákimdikterge shaǵyn jáne orta kásipkerlik sýbektilerimen atqarylatyn dámhana, shashtaraz, dúken aýmaqtaryn sanıtarlyq tazalaý jumystaryn muqııat qadaǵalaý tapsyryldy. Densaýlyq basqarmasyna turǵyndarǵa medısınalyq qyzmet kórsetýdiń sapasyn arttyrý boıynsha jumystar júrgizý mindeti júkteldi. Jylqybaı JAǴYPARULY, «Egemen Qazaqstan».