Sýret: info.homsters.kz
Búginde turǵyn úıdi zilzaladan saqtandyrý múlikti erikti saqtandyrý sheńberinde júzege asyrylady. Osy qyzmet túri boıynsha 25 saqtandyrý uıymynyń 15 lısenzııasy bar. Bul rette turǵyn úıdi tabıǵı apattardan saqtandyrýmen qamtý elimizde nebári 3,2%-dy quraıdy. Jer silkinisi men sý tasqyny qaýpi joǵary Almaty qalasynda bul kórsetkish 7,7%-ǵa jetedi. Jyl basynda saqtandyrý sharttarynyń sany 310,6 myńnan asty, onyń 70,6%-y – jeke tulǵalarǵa, 29,4%-y zańdy tulǵalarǵa tıesili.
Qujatqa sáıkes erikti múliktik saqtandyrý polısteri quny qymbat, sondyqtan kópshilik ony jetkilikti deńgeıde rásimdeı almaı otyr.
Birinshi kezeńde apattardan zardap shekken azamattardyń shyǵystaryn tólengen saqtandyrý syılyqaqysynan 500 ese mólsherde ǵana jabýǵa bolady. Iаǵnı 1 myń teńge tólegende tólem 500 myń teńge bolady. Qarajattyń jınaqtalýyna qaraı jóndeýge nemese jańa turǵyn úı satyp alýǵa arnalǵan shyǵystar da óteledi. Qarjy naryǵyn retteý jáne damytý agenttiginiń basshysy Mádına Ábilqasymovanyń aıtýynsha, saqtandyrýdyń mólsheri jıilikke jáne belgili bir óńirdiń táýekelge ushyraýyna baılanysty.
«Somalar jyljymaıtyn múlik salyǵyna mólsherles bolýǵa tıis – jylyna 1 myńnan 10 myń teńgege deıin. Bul rette turǵyn úılerdi mindetti saqtandyrý júıesi turǵyn úıdi qalpyna keltirýge, barlyq saldardy joıýǵa, sondaı-aq apattan zardap shekken azamattardyń barlyq shyǵynyn toltyrýǵa arnalǵan shyǵyndardy tolyq jabýǵa múmkindik bermeıdi. Alǵashqy úsh jylda mindetti jarnalar memlekettik qorda jınaqtalady. Keleshekte qaıta saqtandyrýǵa jeke saqtandyrý kompanııalary da qosylýy múmkin», deıdi.
Resmı derekterge súıensek, el aýmaǵynyń 75%-y jer silkinisinen bastap sý tasqyny men orman órtteri týyndaýy múmkin qaýipti aımaqtar bolyp sanalady. 2024 jyly tótenshe jaǵdaı saldarynan 460 mlrd teńge shyǵyn esepteldi. Bul 2023 jylmen salystyrǵanda 2,6 ese kóp.
Saıasattanýshy Dosym Sátpaevtyń pikirinshe, bastapqy kezeńde belgili bir sanattar úshin qalypty tarıfter engizip, sodan keıin saqtandyrý mólsherlemelerin arttyra otyryp, tájirıbeni elimizdiń barlyq aýmaǵyna taratý kerek.
«Ortalyqtan shalǵaı aımaqtarda kóptegen turǵyn úıdiń qyzyl syzyqtyń ústine salynyp ketkeni endi aıtylyp jatyr. Zań boıynsha Úkimet mundaı úılerge ótemaqy berýge mindetti emes. Biraq memlekettiń naryqtyq emes, áleýmettik mártebesi tótenshe jaǵdaılarda kómekke muqtaj aǵaıynǵa járdemdesýdi mindetteıdi. Halyqtyń tabysy ekonomıkalyq ósimge ilese almaı jatyr. Aldaǵy ýaqytta turǵyn úı aýdıti tetikterin jetildirmeı, biz bul máseleni sheshe almaımyz. Sondyqtan turǵyn úıdi mindetti saqtandyrýdy kezeń-kezeńimen júrgizip, osy máseleni sheship alýymyz kerek»,– deıdi sarapshy.
ALMATY
