Foto: Yuganov Konstantin / Shutterstock / FOTODOM
Kórermen kóńilinen shyǵatyn kontent jasaý men daıyn ónimdi jetkilikti deńgeıde nazarǵa utymdy usyný – tıynnyń eki beti sekildi bólek is. Alǵashqy satydan ótken shyǵarmashylyq ujym ekinshi baspaldaqqa taıaǵanda tejelýi múmkin. О́ıtkeni medıaónimdi qaı jolmen jarnamalaý, qandaı platformada kórsetý, jobaǵa ketken shyǵyndy óndirý sekildi saýaldar osy tusta týady. Keıingi jyldary táýelsiz bastamashylardyń osy mazmundaǵy júgin strımıng platformalar jeńildetip otyr. Olar óz kezeginde ónimdi satyp alyp, sáıkesinshe jeke platformalarynda ǵana kórsetýdi kózdeıdi. Forým aıasynda medıaónim óndirýshiler men strımıng ındýstrııa ókilderi is júzinde kezigip otyrǵan kedergilerdi ashyq talqylady. Sondaı-aq qatysýshylar kórermen talǵamynyń ózgerýi, platformalar arasyndaǵy báseke jáne jańa monetızasııa modelderi jaıly da pikir almasty.
Paneldik sessııanyń qatysýshysy, «Qulaqsal» kreatıvti stýdııasynyń bas prodıýseri Nurtileý Amangeldi otandyq strımıng platformalardyń shyǵarmashylyq ujymdarǵa usynatyn qarjysy kóńil kónshitpeıtinin atap ótti.
«Táýelsiz kreatıvti stýdııalarǵa kıno-serıaldardy túsirip, strımıng platformalarǵa usyný áldeqaıda jeńil. Degenmen bizdiń tájirbıemizde jańadan ashylǵan platformalar eńbegimizdi laıyqty baǵalaı qoımady. Máselen, kıno týyndyny túsirýge 60 mıllıon shyǵyndasaq, naryqtaǵy baǵadan tómen etip 20 mıllıon usynyp jatady. Sondyqtan biz sekildi shyǵarmashylyq ujymdarǵa alternatıvti jol izdeýge týra keledi. Menińshe, tyń ıdeıamen kınoındýstrııaǵa qadam basqan talantty qoldaý tetikterin engizý kerek. Bul usynysqa strımıng platformalar da múddeli bolsa qos tarap ta utar edi», dedi Nurtileý Amangeldi.
Qazir elimizdegi strımıng platformalar júıesi aıaqtan nyq turmaǵany túsinikti. Dese de Kınopoısk, Movie service pen osy jyldyń qyrkúıeginde tusaýy kesilgen UNICO Play ulttyq strımıngtik platformalary salaǵa serpin berip keledi. Platforma ókilderiniń qazirgi kózdegeni onlaın kıno alańdy azamattardyń qoldanýyna yńǵaıly etý jáne ózara básekelestik arqyly kemshin tusty túzeý eken. Bul týraly otandyq TV+ onlaın platformasynyń kontent-dırektory Sandýǵash Rahymjanova tilge tıek etti.
«Keıingi jyldary álemde Netflix, Amazon prime, Ivi sııaqty platformalar jıi qoldanylyp júr. Asa tanymal Netflix-ke jazylýshylar sany mıllıonnan asyp jyǵylady. Netflix buǵan deıin shyǵarylǵan fılmder usynatyn medıateka ǵana emes, ózi de fılmder túsirýdi qolǵa alyp otyr. Biz de osy úlgini qoldanamyz. Sonymen birge, qoldanýshylardyń platformany paıdalaný deńgeıi yńǵaıly bolý úshin birshama táýekelge baryp otyrmyz. Keı júıeler, tipti jeke derekterdi termeı-aq, kúrdeli fýnksııalardy oryndamaı-aq qoljetimdi. Sáıkesinshe, medıaónimge qoljetkizý múmkindigin syılaıtyn tirkelý quny da 4 500 teńge shamasyndaǵy sımvoldyq baǵa», degen TV+ onlaın platformasynyń kontent-dırektory satyp alýshy kontenttiń kóleńkeli alańdarda taralyp ketpeýine de kúsh salatynyn aıtty.
«Jahandaný kezeńinde kınotýyndylardyń túrli telegram aranalar arqyly pırattyq jolmen taralyp ketý qaýpi joǵary. Bul óz kezeginde kıno avtorlarynyń dittegen qarjysyna qol jetkizýine aıtarlyqtaı kedergi keltiredi. Al strımıng platformalar bul qaýipti boldyrmaýǵa kepildik beredi. Sondyqtan platformalar tarapynan jasalatyn usynystar óndirýshi kezigetin kedergilerdiń aldyn alýdy kózdeıdi», dedi spıker.
Sala mamandary joǵaryda atalǵan azdy-kópti túıtkilder bar bolǵanymen elimizde onlaın kórermenderdiń sany artyp jatqanyn atap ótti. Demek, sapaly, suranystaǵy kıno-serıaldy úıden shyqpaı tamashalaýǵa múmkindik beretin platformalar naryǵyna áli talaı kompanııalar kelýi bek múmkin.
