Memleket basshysy Qasym-Jomart Toqaev óz sózinde «Ádiletti qoǵamdy qurý úshin, eń aldymen, óskeleń urpaqtyń jan-jaqty, tolyqqandy damýyn qamtamasyz etý mańyzdy. Sondyqtan mektepterdegi bilim berý isi balalardyń áleýmettik jaǵdaıyna qaramastan, ınklıýzıvti ári barlyq bala úshin qoljetimdi bolýǵa tıis», degen edi. Bul rette «Amanat» partııasy Áıelder qanatynyń bastamasymen «Kedergisiz keleshek» jobasy aıasynda Oqý-aǵartý mınıstrligi, Qazaqstannyń bochcha federasııasy, Ulttyq ǵylymı-praktıkalyq dene tárbıesi ortalyǵy, Sportty damytý dıreksııasy jáne Astana qalasy ákimdigimen birlesip, «Teń múmkindikter» festıvali uıymdastyryldy.
Maqsat – erekshe balalardy qoǵam ómirine beıimdeý, olardyń sport arqyly áleýetin ashý jáne ınklıýzıvti orta qurýǵa yqpal etý. Jıyndy ashqan «Amanat» partııasynyń atqarýshy hatshysy Dáýlet Káribek bul festıval qaıyrymdylyq pen baýyrmaldyq toǵysqan biregeı alańǵa aınalyp otyrǵanyn atap ótti.
– Prezıdent Qasym-Jomart Toqaev ınklıýzıvti sportqa erekshe mán berip keledi. Memleket basshysynyń tikeleı tapsyrmasymen osy baǵytta júıeli jumys júrgizilip jatyr. Bıyl ekinshi márte ótip jatqan «Teń múmkindikter» festıvali – sonyń aıqyn dáleli. Irikteý kezeńine 2 myńnan asa úmitker qatysyp, úzdikter anyqtaldy. Qatysýshylardyń barlyǵy bolashaqta úlken jetistikke jetip, halyqaralyq arenada bedeldi sporttyq marapattarǵa ıe bolady dep senemin, – dedi D.Káribek.
Festıvalǵa partııanyń Áıelder qanatynyń tóraǵasy Sholpan Karınova, Májilis depýtattary, «Amanat» partııasy fraksııasynyń músheleri Erlan Ábdıev pen Natalıa Dementeva, Oqý-aǵartý mınıstrligi Ulttyq ǵylymı-praktıkalyq dene tárbıesi ortalyǵynyń dırektory Arman Tashmetov, Olımpıada chempıony Dmıtrıı Balandın, sondaı-aq qoǵamdyq uıym ókilderi, sport qaıratkerleri, ustazdar men ata-analar qatysty.
Sholpan Karınova erekshe qajettiligi bar balalardyń jigerin janıtyn, rýhyn kóteretin osyndaı ıgi is-sharalardy uıymdastyrý asa mańyzdy ekenin aıtty.
– Elimizdiń ár azamaty úshin kedergisiz orta qurý – partııanyń saılaýaldy baǵdarlamasyndaǵy basym baǵyttardyń biri. Teń múmkindik – barshamyzǵa ortaq qundylyq. Partııamyzdyń bastamasymen ótip jatqan bul festıval erekshe qajettiligi bar balalardyń óz kúshine senýine, jańa orta qalyptastyrýyna jáne qoǵamǵa beıimdelýine jol ashady, – dedi Sh.Karınova.
Inklıýzııa máselesin jıi kóterip júrgen Erlan Ábdıev erekshe balalardyń erik-jigeri, tabandylyǵy men ómirge degen qushtarlyǵy bárimizge úlgi bolýǵa tıis deıdi.
– Inklıýzııa – tek memlekettik baǵdarlama nemese áleýmettik saıasat emes, bul – kúndelikti qarym-qatynastyń mádenıeti, qoǵamnyń rýhanı deńgeıi men azamattyq jaýapkershiliginiń aınasy. Biz Májiliste erekshe qajettiligi bar azamattardyń quqyǵyn qorǵaý, áleýmettik jáne ınfraqurylymdyq qoldaýdy kúsheıtý baǵytynda únemi bastama kóterip júrmiz. Biraq eń mańyzdysy – qoǵamnyń sana-sezimi men kózqarasynyń ózgerýi. Mine, dál osyndaı ıgi is-sharalar sol ózgeristiń bastaýy, – dedi májilismen.
Festıval qorytyndysynda jeńimpazdar men júldegerlerge kýbokter men arnaıy syılyqtar tabystaldy.Partııanyń «Halyqpen birge!» saılaýaldy baǵdarlamasyn júzege asyrý aıasynda elimizde erekshe bilim berýdi qajet etetin 16,9 myń balany qamtıtyn 1,8 myń ınklıýzııa kabıneti jáne 5,5 myń balany qamtıtyn 688 beıimdelgen sport seksııasy jumys isteıdi.
Sonymen qatar Májilistegi partııa fraksııasynyń depýtattary bastamasymen turǵyn úı zańnamasyna I jáne II toptaǵy múgedektigi bar azamattarǵa, múgedek balalary bar otbasylarǵa baspanany birinshi kezekte alý quqyǵyn bekitetin normalar engizildi. Sondaı-aq joǵary oqý oryndaryna múmkindigi shekteýli azamattardy qabyldaý kvotasy 1 paıyzdan 2 paıyzǵa deıin ulǵaıtyldy.
