О́ndiris oryndaryn aralady

Investısııalar jáne da­mý mınıstri Áset Isekeshev Qos­tanaı oblysynda bolyp, kásip­oryndardy aralady. Ol aldymen oblys ortalyǵyndaǵy  «Evraz­KaspıanStal» jaýapkershiligi shek­teýli seriktestigi men «Baıan sulý» aksıonerlik qoǵamynda boldy. Bul kásiporynnyń alǵashqysy ındýstrııalandyrý baǵdarlamasynyń birinshi besjyldyǵyndaǵy  iri ınvestısııalyq joba bolatyn. Ol  qurylysqa qajetti beltemir shyǵarady, onyń ónimi elimizdi tolyq qamtamasyz etip, Reseı, О́zbekstan, Qyrǵyzstan, Tájikstan respýblıkalaryna da artylady. Bıyl zaýyt 365 myń tonna beltemir shyǵarýdy josparlap otyr. Eń bastysy, munda 256 adam jumys ornyn tapty. Al «Baıan sulý» kondıter fabrıkasy oblystaǵy eksporttaýshy kásiporyndardyń bel ortasynan oıyp oryn alady. Mınıstr saparynyń ekinshi kúni Rýdnyı qalasynda bolyp, «Lıder-2010» sút zaýytyn jáne Sokolov-Sarybaı ken óndirý birlestiginiń metall ılek  zaýytyn aralady. «Lıder-2010» sút zaýyty bul kúnde kásiporynnyń qýatyn arttyrý baǵytyndaǵy jumystar júrgizip otyr.  Onyń ónimderi Qazaqstannyń barlyq óńirine jetkiziledi, sonymen qatar kórshi Reseıdiń onshaqty aımaǵyna shyǵarylady. Ústimizdegi jyldyń maýsym aıynda úshinshi korpýs paıdalanýǵa berilgen soń, sút ónimderiniń túri kóbeıedi, sonda elýge jýyq túrin tutynýshyǵa usynady. Metall ılek zaýyty da daǵdarysqa qarsy jumys istep  otyrǵan jobanyń biri. Munda negizinen Sokolov-Sarybaı ken óndirý birlestiginiń qajeti úshin metall ılek óndiriledi. Sonymen qosa onyń on bes paıyzy syrtqa shyǵarylady. Zaýytta 500 adam eńbek etedi. Metall ılekteý óndirisiniń ónimdiligi qazir 6 myń tonnadan artyq ulǵaıdy. Mınıstr Áset Isekeshev daǵdarys kezindegi ónerkásip kásiporyndarynyń jumys qarqynyn óz kózimen kórip, olardyń josparlarymen tanysty. Sonymen qatar, keńes ótkizip, onda kásiporyndarǵa kómek úshin Úkimet tarapynan qandaı jumystar jasalyp jatqanyn túsindirdi, osy mınıstrliktiń Indýstrııalyq damý jáne ónerkásip qaýipsizdigi komıtetiniń tóraǵasy Amanııaz Erjanov. Investısııalar jáne  damý mınıstri Áset Isekeshev oblys ákimi Nuraly Sádýaqasovtyń  2014 jylǵy ekonomıkalyq-áleýmettik damý qorytyndylary men 2015 jylǵa arnalǵan negizgi mindetteri týraly jurtshylyq aldyndaǵy esep berý jıynyna qatysty. Názıra JÁRIMBETOVA, «Egemen Qazaqstan». Qostanaı oblysy.