Syrtqy ister mınıstrliginiń málimetinshe, qujattar ónerkásip, energetıka, sıfrlandyrý, bilim berý jáne ınnovasııalar sııaqty negizgi salalardy qamtıdy. Bul kelisimder Qazaqstan men AQSh arasyndaǵy strategııalyq seriktestikti jańa deńgeıge kóterip, ózara senimdi nyǵaıtýǵa baǵyttaldy.
John Deere Qazaqstanda aýyl sharýashylyǵy tehnıkasyn shyǵarady
Sapardyń basty nátıjeleriniń biri – QR Indýstrııa jáne qurylys mınıstrligi, «Báıterek» UBH» AQ, «AgromashHoldıng KZ» AQ, «Eurasia Group AG» jáne «John Deere» kompanııasy arasynda jalpy quny 2,5 mlrd AQSh dollaryn quraıtyn strategııalyq kelisimge qol qoıylýy boldy. Qujatqa sáıkes Qostanaı jáne Túrkistan qalalarynda «John Deere» markaly 3000-ǵa deıin aýyl sharýashylyǵy tehnıkasyn shyǵarý, úsh servıs ortalyǵyn salý, kadrlardy daıarlaý júıesin damytý jáne Qazaqstandy TMD elderine arnalǵan qosalqy bólshektermen qamtamasyz etetin óńirlik hab retinde qalyptastyrý kózdelgen.
Qazaqstan men AQSh birlesip volfram ken oryndaryn ıgeredi
Taý-ken ónerkásibi salasynda «Taý-Ken Samuryq» ulttyq taý-ken kompanııasy men «Cove Capital» kompanııasy jalpy quny 1,1 mlrd AQSh dollaryn quraıtyn kelisimge qol qoıdy. Joba Qaraǵandy oblysyndaǵy álemdegi eń iri Soltústik Katpar jáne Joǵarǵy Qaıraqty volfram ken oryndaryn birlesip ıgerýdi kózdeıdi. Bul bastama tereń óńdeý qýattaryn quryp, qosylǵan quny joǵary ónim óndirýge múmkindik beredi.
Air Astana men Boeing jańa ushaqtar jetkizý týraly kelisim jasasty
«Air Astana» AQ jáne «Boeing» korporasııasy 18 jańa keń fıýzelıajdy «Boeing 787-9 Dreamliner» ushaǵyn jetkizý jónindegi ózara túsinistik týraly kelisimge qol qoıdy. Bul kompanııaǵa negizgi baǵyttar boıynsha jolaýshylar tasymaldaý áleýetin arttyrýǵa jáne marshrýttyq jelini ıkemdi damytýǵa múmkindik berip, 2026 jyldan bastap Qazaqstandy Eýropa, Azııa, AQSh jáne Taıaý Shyǵystyń iri iskerlik jáne týrıstik ortalyqtarymen baılanystyrýǵa jol ashady.
Starlink jáne Beeline shalǵaı óńirlerdi spýtnıktik baılanyspen qamtamasyz etedi
Sonymen qatar QR Jasandy ıntellekt jáne sıfrlyq damý mınıstrligi, «Beeline Qazaqstan» jáne «Starlink» kompanııalarynyń qatysýymen úshjaqty kezdesý ótti. Kezdesý barysynda «Direct-to-Cell» tehnologııasyn engizýge baǵyttalǵan ózara túsinistik týraly memorandýmǵa qol qoıyldy. Bul seriktestik Qazaqstannyń búkil aýmaǵynda, sonyń ishinde jerústi baılanysy joq shalǵaı óńirlerde de qoljetimdi spýtnıktik baılanysty qamtamasyz etýge múmkindik beredi.
Qazaqstan elektr avıasııasy men aerotaksı jobalaryn iske asyrady
Zııatkerlik mobıldilik jáne ekologııalyq taza tehnologııalar salasynda Qazaqstan «BETA Technologies» jáne «Joby Aero Inc.» kompanııalarymen jalpy quny shamamen 300 mln AQSh dollaryn quraıtyn memorandýmdarǵa qol qoıdy. Jobalar elektr avıasııasyn, aerotaksı jáne ıntellektýaldy kólik júıelerin damytýǵa baǵyttalǵan.
Qarjy salasynda álemdik qorlarmen birlesken jobalar iske asady
Qarjy jáne ınvestısııa salasynda Qazaqstan Ulttyq Bankiniń Ulttyq ınvestısııalyq korporasııasy (NIC NBK) álemniń jetekshi ınvestısııalyq qorlarymen – «Brookfield Asset Management», «Cerberus Capital Management» jáne «Ashmore Investment Advisors Corporation» – shamamen 1 mlrd AQSh dollaryna teń úsh kelisim jasasty. Bul jobalar ınfraqurylymdy, jeke kapıtal men qaryz naryǵyn damytýǵa baǵyttalǵan. Sonymen birge Ulttyq bank pen «Visa» kompanııasy sıfrlyq tólemder, kıberqaýipsizdik jáne shaǵyn jáne orta bıznesti qoldaý salalarynda yntymaqtastyq týraly memorandýmǵa qol qoıdy. Qujat «Ulttyq tólem kartalary» AQ bazasynda Quzyretter ortalyǵyn qurýdy kózdeıdi.
ChatGPT Education jáne ETS: bilim berý júıesi jańa tehnologııalarmen túrlenedi
Bilim jáne ǵylym salasynda «Arizona State University», «Colorado School of Mines», «Coursera, OpenAI», «Freedom Group Inc.» jáne basqa seriktestermen jalpy quny shamamen 50 mln AQSh dollaryn quraıtyn kelisimderge qol qoıyldy. Bul bastamalar Jezqazǵanda Ulytaý tehnıkalyq ýnıversıtetin qurýdy, qos dıplomdyq baǵdarlamalardy damytýdy, oqý úderisin sıfrlandyrýdy jáne «ChatGPT Education» negizinde ınnovasııalyq sheshimderdi engizýdi qamtıdy.
QR Ǵylym jáne joǵary bilim mınıstrligi men AQSh-tyń «Educational Testing Service» (ETS) halyqaralyq uıymy ulttyq testileý júıesin jasandy ıntellekt pen adaptıvti oqytý tehnologııalaryn qoldaný arqyly jańǵyrtýǵa baǵyttalǵan jol kartasyna qol qoıdy.
Qazaqstanda halyqaralyq kópsalaly klınıka salynady
О́nerkásip jáne medısına salalarynda «Samuryq-Qazyna» AQ jáne «Ashmore Investment Advisors» kompanııasy jalpy quny 150 mln AQSh dollaryn quraıtyn jobany iske asyratynyn habarlady. Bul joba Qazaqstandaǵy alǵashqy halyqaralyq brendti kópsalaly klınıkany qurýdy kózdeıdi, ol óńirlik zamanaýı medısına habyna aınalmaq.
Qazaqstan AQSh-ta alǵashqy ónerkásiptik ınvestısııalyq jobasyn iske asyrady
Sonymen qatar «1Thirty Holding» (AsiaColor) jáne «Business Council for International Understanding» (BCIU) arasynda 130 mln AQSh dollaryna teń memorandýmǵa qol qoıyldy. Joba AQSh-ta untaq jabyndary men polıefırli shaıyrlar óndiretin vertıkaldy ıntegrasııalanǵan hımııa keshenin salýdy kózdeıdi. Bul – Qazaqstannyń AQSh-taǵy alǵashqy ónerkásiptik ınvestısııalyq jobasy.
Jalpy, sapar aıasynda qol qoıylǵan qujattar Qazaqstan men AQSh arasyndaǵy joǵary deńgeıdegi senimdi jáne strategııalyq seriktestiktiń ınnovasııalar, ınvestısııalar jáne ornyqty damý baǵytyndaǵy tereńdeýin aıqyn kórsetti.
