Shyǵysta eń alǵash sadaq atý dástúrin qaıta jańǵyrtqan – osy Ajar Tóleýhanova. Ol Glýbokoe kentinde mergender mektebin ashyp, shákirt tárbıeleýdi qolǵa alǵan. Á degende-aq adyrna tartýǵa qyzyqqandar kóp boldy. Mektep oqýshylary qyzyǵyp qana qoımaı, respýblıkalyq jarystarda júldeden júlde qoımady. Keıin Ajar ózi kelin bolyp túsken úı ishin de sadaq atýǵa baýlyǵan. Qazir oblystaǵy kil mergender osy áýletten shyǵady. Bul sózimizdi kúni keshe sadaqty sánge tartatyn saq hanshaıymdarynyń búgingi beınesindeı arýlar taǵy bir márte dáleldedi. Tipti sonaý túkpirdegi túbekte ótken dodada qazaqtyń qyzdary 535 sportshy qatysqan synnan sýyrylyp alǵa shyqty. Júldegerler elge kelisimen jankúıerleri aıaqtaryn jerge tıgizbeı kútip aldy. Mundaı qoshemetke ıe bolǵan júldegerler de rızashylyqtaryn bildirip jatty.
– Bul jarys biz úshin ońaı bola qoımady. 32 elden mergenderdiń mergeni kelip baq synady. Qazaqstan quramasynan 34 sadaqshy el namysyn qorǵady. Osyndaı jarysta jeńip shyǵamyn dep oılamadym. Meni qoldaǵan jerlesterime, otbasyma, kútip alyp jatqan jankúıerlerge kóp rahmet. Al sadaq tartýǵa qyzyqtyrǵan kelinim Ajarǵa myń alǵys, – dedi jeńimpazymyz Aıash Qabdollaeva.
Aıta keteıik, Aıash Qabdollaeva kóp jyl Glýbokoe kentindegi Oralhan Bókeı atyndaǵy orta mektepte ustazdyq etedi. Ustazdyq ete júrip, mergendik ónerdi bertin meńgerdi. Sonyń ózinde bıik belesterdi baǵyndyryp júr. Iá, sadaq tartý jas talǵamaıdy. Keń ǵımarat bolsa – bolǵany. Ajar ashqan mergender mektebi munymen toqtap qalmaq emes. Júlde qorjyny áli talaı altyn men kúmiske tolary anyq.
Shyǵys Qazaqstan oblysy
