Bul týrızm ındýstrııasyndaǵy eń iri oqıǵalardyń biri, onda jyl saıyn túrli el men kompanııa ókilderi bas qosady.
Almatynyń kórmege qatysýy qalany Ortalyq Azııanyń zamanaýı, qaýipsiz ári shabyt beretin týrıstik baǵyty retinde tanytýǵa baǵyttaldy. Qala ózin Ile Alataý taý silemderine bastaıtyn qaqpa ǵana emes, mádenıet, gastronomııa jáne oqıǵalyq týrızm ortalyǵy retinde kórsetýdi kózdegen.
2025 jyldyń alǵashqy alty aıynda qalaǵa 1,14 mıllıonnan astam týrıst kelgen. Onyń ishinde 320 myńnan kóbi – sheteldik qonaqtar. Ásirese, Ulybrıtanııadan kelýshiler sany 16%-dan asqan.
«WTM London – Almatyny álemge jańa qyrynan shyǵys dástúri men megapolıs yrǵaǵy toǵysqan qala retinde tanystyrýǵa múmkindik beredi. Biz Almatynyń jylylyq, tabıǵat jáne shabyt sımvolyna aınalǵanyn qalaımyz», – dep málimdedi qalanyń Týrızm basqarmasy.
Almatynyń kórme stendinde Londondyqtar qala mádenıeti men rýhyn sezindi: dombyra men qobyzdyń áýeni shyrqalyp, qazaq batyrlary óner kórsetti, qonaqtar qazy, baýyrsaq, jent jáne qymyz sııaqty ulttyq taǵamdardyń dámin tatty.
Sonymen qatar kórme halyqaralyq týroperatorlarmen, áýe kompanııalarmen jáne medıa ókilderimen jańa iskerlik baılanys ornatýǵa arnalǵan alań boldy. Ásirese, turaqty týrızmge jáne MICE-týrızmge (iskerlik is-sharalar týrızmi) damytýǵa, sondaı-aq Almatyny saıahatshylar úshin barynsha jaıly etetin ınfraqurylymdyq jobalarǵa basa nazar aýdaryldy.
