Jańa zań jobasynyń basty maqsaty – basqarý júıesiniń ashyqtyǵy men eseptiligin qamtamasyz ete otyryp, jergilikti bılik organdarynyń derbestigin kúsheıtý. Bul turǵyndardyń kúndelikti ómirine tikeleı áser etetin máselelerdiń jedel ári ádil sheshilýine jol ashady. Sonymen qatar osy reforma óńirlik damý josparlaryn halyqpen birlesip talqylaý, bıýdjetti basqarý isine qoǵam ókilderin tartý syndy tetikterdi jetildirýge múmkindik bermek.
Álemdik tájirıbe kórsetkendeı, damyǵan elderde ózin-ózi basqarý organdarynyń quzyreti keńeıip, ákimshilik-aýmaqtyq birlikterde halyqtyń suranysyna saı sheshim qabyldaý múmkindigi artyp keledi. Qazaqstan bul baǵytta ilgeri jyljýǵa nıetti. Jańa zań jobasynda aýyl, aýdan, qala deńgeıinde máslıhattardyń róli men jaýapkershiligi naqty belgilenip otyr. Depýtattar zań jobasy jergilikti ózin-ózi basqarýdy damytý tujyrymdamasyn iske asyrý, sondaı-aq Memleket basshysynyń Qazaqstan halqyna Joldaýynda kózdelgen azamattardyń jergilikti mańyzy bar máselelerdi sheshýge qatysý tetikterin ınstıtýsıonaldy turǵydan nyǵaıtý jónindegi saıası reformany júzege asyrý sheńberinde ázirlengenin aıtady.
Usynylyp otyrǵan ózgerister ózin-ózi basqarý ınstıtýttaryn damytýǵa, bıliktiń ashyqtyǵy men eseptiligin arttyrýǵa baǵyttalǵan.
«Keıingi eki-úsh jylda aýyl, aýdan ákimderin, úlken shahar ákimderin saılaı bastadyq. Olar saıası ómirmen qatar bıýdjettik ómirge aıaq basyp jatyr. Saılanǵan depýtattar men saılanǵan ákim bir-birimen qalaı jumys isteýi kerek? Olardyń halyqqa bergen ýádesi, saılaýaldy baǵdarlamasy bar. Basqosýǵa birqatar saılanǵan aýyl, aýdan ákimderin arnaıy shaqyryp otyrmyz. Olardyń da únin tyńdaǵymyz keledi. Elimizdegi máslıhattardyń rólin kóterý de – mańyzdy másele. Aımaqtardaǵy áriptesterimiz qazirgi májiliste bar dúnıeni ózderine alyp kelýdi, basqarmalar ózderine kelip esep beretindeı jaǵdaı týsa degen tilekterin bildirip jatady. Menińshe, osy zań endi osyndaı qarym-qatynastardyń negizin jasaıdy. Máselen, aýdandyq, qalalyq, oblystyq bıýdjet qoǵamnyń nazaryndaǵy úlken másele bolýy kerek. Sol kezde jemqorlyq azaıady, talap ózgeredi, sonda ǵana biz osy qazir respýblıkalyq dárejede bolyp jatqan úlken ózgeristerdi aımaqqa jetkize alamyz», deıdi A.Sarym.
Elimizde ákimderdi saılaý reformasy júzege asqaly beri kúni búginge deıin 3 500 ákim saılanǵan. Olardyń 48-i – aýdan ákimderi. Basqosýda sóz alǵan Ulttyq ekonomıka vıse-mınıstri Baýyrjan Omarbekov ákimderdiń saılaýaldy baǵdarlamasy men bergen ýádelerine qatysty naqty tetikter men jaýapkershiliktiń bolmaýy másele týyndatyp otyrǵanyn aıtyp birqatar usynysyn jetkizdi.
Jıynda sondaı-aq zań jobasynyń bastamashylarynyń biri, Májilis depýtaty Ekaterına Smyshlıaeva, Almaty oblysy Raıymbek aýdanynyń ákimi Dastan Qudabaev, Almaty oblysy Eńbekshiqazaq aýdany Baltabaı aýylynyń ákimi Sáýle Alıpova jáne basqa da sarapshylar óz pikirleri men usynystaryn ortaǵa saldy.
ALMATY
