Foto: Ashyq derekkóz
Resmı málimetke sáıkes, ótken aıda el boıynsha turǵyn úıdi satyp alý-satý boıynsha 41 259 mámile jasalǵan. Onyń ishinde 8 717-si jeke turǵyn úılerge, al 32 542-si kóppáterli úılerdegi páterlerge tıesili. Bul kórsetkish ótken jyldyń qyrkúıek aıymen salystyrǵanda nebári 0,1 paıyzǵa az.
Mámilelerdiń basym bóligi elorda men megapolıste shoǵyrlanǵan: Astanada – 8 945 (21,7%), Almatyda – 7 868 (19,1%) mámile tirkelgen. Úshinshi orynda Qaraǵandy oblysy – 2 982 mámile (7,2%). Al eń tómengi kórsetkish Ulytaý oblysynda baıqaldy – bar bolǵany 327 mámile (0,8%).
О́tken jylmen salystyrǵanda turǵyn úı saýdasy Qostanaı oblysynda – 15,8%, Shymkentte – 7,7%, Almaty oblysynda – 7,4% ósken. Al Qyzylorda (-28,4%), Almaty (-11,2%) jáne Aqtóbe (-5,2%) oblystarynda baspana saýdasy tómendegen.
Kóppáterli úıler segmentinde mámileler úlesi – 78,9% boldy. Qazan aıynda páterlerge qatysty 32 542 mámile jasalyp, olardyń negizgi bóligi Astana (27%), Almaty (22,2%) jáne Qaraǵandy oblysyna (7,8%) tıesili. Eń suranysqa ıe – eki bólmeli páterler, olar boıynsha 12 399 mámile rásimdelgen.
Jeke turǵyn úıler naryǵynda mámileler sany qyrkúıekpen salystyrǵanda 0,6% (56 mámile) artqan. Barlyǵy 8 717 mámile tirkeldi. Eń joǵary ósim Qostanaı (+18,4%), Shyǵys Qazaqstan (+16,5%) jáne Batys Qazaqstan (+11%) oblystarynda baıqalsa, Ulytaý (-15,9%), Qyzylorda (-10,7%) jáne Qaraǵandy (-8,3%) óńirlerinde kerisinshe tómendeý tirkeldi.
Jalpy alǵanda, 2024 jyldyń qazanymen salystyrǵanda el boıynsha turǵyn úı saýdasy 5,4% artqan. Ásirese, Astanada mámile sany 27,9%-ǵa ósken, al eń aıtarlyqtaı tómendeý Ulytaý oblysynda (-38%) baıqaldy. Bıylǵy qańtar-qazan aılarynda turǵyn úı mámileleriniń jıyntyq kólemi ótken jyldyń sáıkes kezeńimen salystyrǵanda 3,5%-ǵa kóp boldy.
