Joldasbekov atyndaǵy Stýdentter saraıy paıdalanýǵa berilgennen beri 30 jyl boıy kúrdeli jóndeýden ótpegen. Sonyń saldarynan ǵımarat tozyp, tehnıkalyq jaǵdaıy aıtarlyqtaı nasharlaǵan.
2023 jyly akkredıttelgen uıym ǵımarattyń tehnıkalyq jaǵdaıyn tekserip, tireýish jáne qorshaý konstrýksııalarynan birqatar aqaýlar anyqtady: jekelegen temirbeton arqalyqtar men qabyrǵalardyń bolmaýy, tireýish kolonnalardyń tot basýy jáne qısaıýy, túıisý bólikteriniń buzylýy, jylý oqshaýlaý qabaty men shatyr jabyndysynyń zaqymdanýy. Aqaýlardyń basym bóligi árleý qabattarynyń astynda jasyrylǵan.
Qoldanystaǵy qurylys normalaryna sáıkes, ǵımarattarǵa kúrdeli jóndeý ár 20-25 jyl saıyn júrgizilýi tıis. Sonymen qatar 2024 jylǵy qańtar aıynda Almatyda bolǵan jer silkinisteri ǵımaratqa eleýli zaqym keltirdi.
Anyqtalǵan aqaýlar men seısmıkalyq qaýipterdi eskerip, ýnıversıtet ǵımarattyń sáýlettik kelbetin saqtaı otyryp, onyń konstrýksııalyq beriktigi men qaýipsizdigin qamtamasyz etý maqsatynda nysandy qaıta jańǵyrtý týraly sheshim qabyldady.
Aıta keteıik, jelide qoǵam qaıratkeri Sanjar Boqaevtyń QazUÝ aýmaǵynda ornalasqan Joldasbekov atyndaǵy Stýdentter saraıynda júrgizilip jatqan qurylys jumystaryna syn aıtqan vıdeosy jarııalanǵan edi. Onda ol ǵımarattyń qasbetindegi tas qabatynyń buzylyp jatqanyn atap ótip, bul nysannyń aýqymdy restavrasııany qajet etpeıtinin aıtty. Ol muny «vandalızmniń taǵy bir kórinisi» dep atap, saraıdyń jaqsy kúıde ekenin jáne áli uzaq ýaqyt boıy turatynyn jetkizdi.
