Almatydaǵy Ulttyq ortalyq mýzeıde onyń ómir órnekterinen syr shertetin «Qazaq dalasyndaǵy Kobzar: tarıh pen taǵdyr toǵysy» atty kórme ashyldy. Kórmede Á.Kekilbaıuly atyndaǵy Mańǵystaý oblystyq tarıhı-ólketaný mýzeıiniń Túpqaraǵan aýdandyq fılıalynyń qorynan alynǵan 160 jádiger kórermen nazaryna usynyldy. Bir basynda birneshe óner toǵysqan tulǵanyń qazaq jerinde dúnıege kelgen týyndylarynan turatyn «Qazaq dalasyn qylqalammen asqaqtatqan...» jáne ýkraın halqynyń ulttyq kıimderi, turmystyq buıymdary men kitaptary qoıylǵan «Ýkraın súlgileriniń sıqyrly álemi» atty qos bólimnen turatyn óner jármeńkesi tarıh betterin qaıta sholýǵa shaqyrady.
О́nertanýshylardyń aıtýynsha, Shevchenkonyń beıneleý ónerindegi 350-ge tarta eńbeginiń 200-ge jýyǵy qazaq dalasynyń tabıǵaty men turmysyna arnalǵan. Kartınalarǵa úńile otyryp, onyń shyǵarmashylyǵy – tek sýretkerlik sheberlik emes, qazaq halqynyń taǵdyryna janashyrlyqpen qaraǵan oıly zertteýshiniń eńbegi ekenin ańǵarasyz.
«1847–1850 jyldary T.Shevshenko Orynborda, Orskide jáne Aral óńirinde, 1850–1857 jyldary Mańǵystaý túbegindegi Novopetrovsk bekinisinde aıdaýda boldy. Ol sol tusta eki ekspedısııaǵa qatysyp kóptegen sýretter salady. 1848–1849 jyldary Aral ekspedısııasynda júrip «Daladaǵy órt», «Jalǵyz aǵash», «Raıym bekinisi», «Qosaraldaǵy shýhnalar» sekildi týyndylaryn kenepke túsirdi. Qarataý ekspedısııasynyń quramyna sýretshi retinde qatysyp, tabıǵat kórinisterin, kóne zırattardyń beınesin, jergilikti halyqtyń tynys-tirshiligin shyǵarmalaryna arqaý etti. Onyń «Qanǵa baba», «Dolana ańǵaryndaǵy túrikmen zıraty», «Aqmysh shatqaly», «Sherqalataý», «Aıly túndegi taý kórinis» syndy akvarelderi ótken kúnnen syr tartady», deıdi Á.Kekilbaıuly atyndaǵy Mańǵystaý oblystyq tarıhı-ólketaný mýzeıiniń dırektory Elvıra Ablanova.
Qazaq pen ýkraın halqynyń tarıhı baılanysyn jańa qyrynan ashyp, daryndy tulǵanyń qazaq jerindegi shyǵarmashylyq murasyn zerdeleýge arnalǵan is-sharada Ulttyq ortalyq mýzeı dırektorynyń mindetin atqarýshy Serjan Sarov, Almaty qalasyndaǵy Ýkraına mádenı ortalyǵy tóraǵasynyń orynbasary Marııa Sheremet, Túpqaraǵan aýdanynyń qurmetti azamaty, akademık Jumat Tilepov sóz sóılep, tulǵalar taǵylymy, qos el dostyǵy turǵysynda oı bildirdi.
ALMATY
