Memleket basshysynyń tapsyrmasynan keıin osy baǵytta turalap qalǵan jumystarda ilgerileý baıqaldy. Mysaly, Almaty qalasynyń Jedel kómek kórsetý aýrýhanasynda pasıentterdiń kelisimderin sıfrlandyrýǵa arnalǵan qanatqaqty joba iske qosylǵan. Bul medısınalyq qyzmet kórsetýdiń qaǵazsyz úlgisine kóshýdiń mańyzdy kezeńderiniń biri. Joba aıasynda TrustCare dep atalatyn júıeni TrustMe kompanııasy men Almaty qalasynyń Jedel kómek kórsetý aýrýhanasy birlesip engizgen. Júıe pasıentterdiń medısınalyq uıymda qalýyna, aýrýhanaǵa jatýǵa, ózge de medısınalyq rásimderge kelisim berýin avtomattandyrady. Endi qaǵaz túrindegi blankilerdiń ornyna pasıentter barlyq qujattarǵa planshet arqyly qol qoıady. Qol qoıylǵan málimetter avtomatty túrde júıede saqtalady.
Jańa tájirıbe dáriger men meıirgerlerdiń buryn aınalysatyn «basyp shyǵarý», «tigý», «muraǵattaý» syndy jumystarǵa ketetin ýaqytyn únemdeýge múmkindik berip otyr. Ári bul sharýa burynǵydan áldeqaıda jyldam, túsinikti, qaýipsiz bola tústi. Qabyldaý bóliminiń jumysynda da qarbalas azaıdy. Bastysy, medısına mamandary óz ýaqytyn esep-qısapqa emes, pasıentterge kóbirek arnaýǵa múmkindik alyp otyr.
Qanatqaqty jobanyń alǵashqy aıynda 10 000-nan astam pasıenttiń «kelisimderi» men «bas tartýlary» rásimdelgen. Qujattarǵa qol qoıý jyldamdyǵy shamamen 60%-ǵa artqan. Kún saıynǵy esep berý ýaqyty 3 saǵattan 15 mınýtqa deıin qysqarǵan. Aldyn ala esep boıynsha, bul tásilmen bir aýrýhana jylyna shamamen 53 mıllıon teńge kóleminde resýrsty únemdeıdi. Munda qarajatpen qatar ýaqyt únemdeletinin eskergen jón. Eger jobany elimizdegi 100 medısınalyq uıym engizse, jalpy ekonomıkalyq áser jylyna jarty mıllıard teńgeden asýy múmkin ekenin alǵa tartady sarapshylar.
– Bizdiń joba tehnologııany damytý degen jeleýmen iske aspaıdy. Bul medısınadaǵy ózara baılanystyń mádenıetin ózgertýdiń joly. Dáriger qaǵazǵa emes, pasıentke kóp kóńil bólgende ǵana búkil júıe utady. TrustCare júıesiniń daıyn nusqasynda jasandy ıntellekt elementteri de engizilgen. Ol jınaqtalǵan derekterdi taldap, «aqyldy» esepter qalyptastyrady. Bul medısınalyq uıymdarǵa basqarýshylyq sheshimderdi dálirek qabyldaýǵa, ishki saraptamany kúsheıtýge múmkindik beredi, – deıdi TrustMe kompanııasynyń operasııalyq dırektory Ǵalymjan Imanǵalıev.
Jobany iske asyrýǵa Almaty qalalyq aýrýhanasynyń ujymy sebepshi bolǵanyn joǵaryda aıttyq. Bul jumysqa bas dáriger Almaz Djývashevtan bastap, medısınalyq bólimniń meńgerýshisi Baǵdad Álimbetov, qabyldaý bóliminiń aǵa meıirbıkesi Gúlzıra Boranbaevalar tartylǵan. Osynyń nátıjesinde júıe naqty jumys barysynda tıimdiligin kórsetip otyr.
