Foto: Depositphotos
Qarjygerler kongresiniń kýlýarynda Ulttyq banktiń sıfrlyq transformasııa jónindegi basshysy Bınýr Jálenov álemde keń taraǵan QR júıesine qazaqstandyq bankter de birtindep qosylyp jatqandyǵyn atap ótti.
«Kelesi jyly barlyq bankter júıege tolyq qosylyp, servıs turaqty jumys istegen kezde, halyqaralyq tólem mehanızmderin retteýge kirisemiz. Bizdiń QR basqa elderdiń qosymshalarynda da oqylýy nemese olardyń QR-lary bizde tanylýy úshin Ortalyq Azııa elderimen, Túrkııamen jáne BAÁ-men kelissózder júrgizip jatyrmyz. Alǵashqy pılottyq jobalar kelesi jyldyń ekinshi jartysynda bastalady», dedi ol.
Onyń sózinshe, mundaı ıntegrasııa QR-kodtardy ózara taný múmkindigin qarastyrady.
Máselen, Qytaıda olardyń termınaldaryn ózińniń qosymshańmen oqı alasyń jáne kerisinshe. Sol tájirıbeni Qyrǵyzstan, Túrkııa, BAÁ baǵytynda da qoldaný josparlanyp otyr. Naqty elder men jumys isteý mehanızmderi keıinirek jarııalanady, dep túsindirdi B. Jálenov.
Sonymen qatar komıssııa mólsherine memleket tarapynan rettelmeıtinin atap ótti. Sondaı-aq, sońǵy jyldary komıssııa kólemi tómendep kele jatqanyn jetkizdi.
Ulttyq bank ókiliniń sózinshe, biryńǵaı QR-dyń negizgi maqsaty – azamattarǵa qolaılylyq jasaý. Búginde ár adamda kem degende 3-4 bank qosymshasy bar, al saýda núktelerinde túrli bankterdiń termınaldary ornatylǵan.
«Biz barlyq bankterdi bir júıege biriktirdik. Endi kez kelgen termınaldy kez kelgen bank qosymshasy arqyly tóleýge bolady. Bul azamattarǵa da yńǵaıly, qarjy naryǵynda básekeni de kúsheıtedi. Qazir Halyk, BCC, Home Credit, Freedom, RBK jáne Altyn Bank tolyq rejımde jumys istep tur. Basqa bankter qosylý prosesinde. Kaspi de júıege kirýge nıet bildirdi, tehnıkalyq ıntegrasııaǵa birneshe aı qajet», dedi ol.
Sonymen qatar telefon nómiri arqyly bankaralyq aýdarym jasaý servısi de keńeıip keledi. Qazir toǵyz bank qosylǵan, jaqyn arada barlyq bankter qosylady dep josparlanǵan.
Aıta keteıik, 13 qarashada Qazaqstanda biryńǵaı bankaralyq QR-tólemder júıesi resmı túrde iske qosylǵan bolatyn.
