"3 orden, 2 medal" Bul derekti bertinde bildik
Áskerge 1939 jyly alynyp, aldymen fın soǵysyna, sońynan Uly Otan soǵysyna qatysyp, 1944 jyldyń kókteminde II top múgedegi bolyp elge oralǵan ákem Begaly Saqypbekov sol bir zulmat jyldardan kóp estelik aıta bermeıtin. Bálkim tánin de, janyn da aıamaı jaralaǵan sol bir qıyn sátterdi esine qaıta túsirip, júregin aýyrtqysy kelmegen bolar. Jalpy, ákemniń áskerı bıletinde Uly Otan soǵysynda aǵa leıtenat Begaly Saqypbekovtiń 5 ret jaralanǵany, onyń ishinde 3 ret kontýzııa alǵany týraly belgi soǵylǵan. «Qyryq jyl qyrǵyn bolsa da ajaldy óledi» degen, ákemiz osynshama qantógisten aman shyǵypty.
Alǵashqy áskerı daıyndyǵyn Ýfa qalasyndaǵy kishi komandırler daıarlaıtyn ýchılıshede ótkizip, fın soǵysyna 4-armııaǵa qarasty 254-arnaıy shańǵyshylar brıgadasynyń quramynda qatysady. Sodan 1942 jyly Smolensk oblysy, Ponızenskıı aýdanynyń, Velojeı qalasy úshin bolǵan urysta oń qolynan jaralanǵan. Keıin Stalıngrad oblysy, Krysheva derevnıasyn, atqyshtar vzvodynyń komandıri bolyp júrip Smolensk oblysy Vıtebsk aýdanynyń Harıtonov derevnıasyn, Velıkıe Lýkı qalasyn nemis basqynshylarynan azat etýde, barlaý vzvodynyń komandıri bolyp júrgen kezinde Polesk qalasynyń mańyndaǵy Beloýs derevnıasynan «til» ákelý tapsyrmasyn oryndaýda avtomattyń oǵynan jáne oń jambasynan pyshaq qarýynan jaralanyp, gospıtalǵa túsipti.
Mine, Uly Jeńistiń 70 jyldyǵy jaqyndap qaldy. Áıtse de bul soǵystyń qupııasy, jumbaǵy áli kóp. Ákem Begaly Saqypbekov óziniń barlyq nagradalary týraly málimetterden beıhabar boldy. Tek sońǵy márte jaralanyp, gospıtaldan shyǵar kezde qujattaryna qol qoıyp jatqan komandıri «nagradaǵa usynarmyz» degen eken. Ákemiz osy jaıtty jıi eske alyp, aıtyp júretin. Tipti, birde KSRO Qorǵanys mınıstrligine hat jazyp kórsem be eken degeni de bar. Endi, mine, «Halyqtar Erligi» jalpyǵa birdeı elektrondy qujattar banki arqasynda Begaly Saqypbekovtiń sońǵy áskerı dárejesi «aǵa leıtenant» ekeni, birneshe orden-medaldarmen nagradtalǵany anyqtalyp otyr. Naqtyraq aıtsaq, «Qyzyl Tý», II dárejeli «Uly Otan soǵysy», «Qyzyl Juldyz» ordenderi men «Erligi úshin», «Germanııany jeńgeni úshin» jáne taǵy basqa birneshe medaldarmen marapattalǵanyn bildik.
Ákem Begaly soǵystan keıingi jyldary óziniń múgedektigine qaramastan aýdannyń bilim salasynda 30 jyldaı eńbek etti. Ol kisi Almaty memlekettik pedagogıkalyq ınstıtýtyn qazaq tili jáne ádebıeti mamandyǵy boıynsha bitirgen. Sarysý aýdanyndaǵy Jaılaýkól, Búrkitti, Kókdala aýyldary men «Jaıylma», «Kommýnar», «Túrkistan», «Jańatas» sovhozdarynyń Talas ózeni boıyndaǵy malshylardyń balalaryn oqytty. Anamyz Kúlbaǵdat Bımendeqyzy da 35 jyl matematıka pániniń muǵalimi bolyp, ákemizben birge qyzmet atqardy. Árıne, musylman balasy bolǵandyqtan, áke-sheshemizge jıi Quran baǵyshtap, úıden «ıis» shyǵaryp turamyz. Tiri bolǵanda bar orden-medaldaryn taǵyp alyp, eldiń aldynda jarqyrap júrer edi, jaryqtyq ákem... Búginde áke-sheshemizdiń kindiginen taraǵan 6 ul-qyzdan 23 nemeresi, 50 shóberesi, 6 nemenesi ósip ónýde. Soǵan Allaǵa myń mártebe shúkirshilik dep otyramyz. Iаǵnı, ákemizdiń ómiriniń jalǵasy bar. Men ákemdi maqtan tutamyn.
Jumabek SAQYPBEKOV.
Jambyl oblysy, Sarysý aýdany, Jańatas qalasy.
