Qoıylym Álisher Naýaı atyndaǵy Memlekettik akademııalyq Úlken teatr sahnasynda alǵash ret kórsetildi. Premerany Mádenıet jáne aqparat mınıstri Aıda Balaeva tamashalady. Sondaı-aq qurmetti qonaqtar retinde Ortalyq Azııa elderi mádenıet mınıstrlikteriniń basshylary men Ázerbaıjannyń Mádenıet mınıstri shaqyryldy.
Hamıt Shańǵalıevtiń mýzykasy rejısser Davıde Lıvermoreniń kórkemdik sheshimimen úılese otyryp, kórermendi Altyn Orda dáýirine jeteleıtin áserli atmosfera jasaı aldy. Kórermen Altyn Orda tarıhyndaǵy oqıǵalar aıasynda órbıtin tragedııalardy kózben kórip, sol kezeńniń rýhyn tereń sezine alady. Altyn Orda – túrki halyqtary tarıhynda erekshe orny bar rýhanı muranyń qaınar kózi.
Operany sahnalaý jumysy halyqaralyq ǵylymı yntymaqtastyqtyń úlgisine aınaldy. Jobaǵa Qazaqstan, Reseı,Túrkııa ǵalymdary atsalysty. Altyn Ordany zertteý ortalyǵynyń jetekshisi Ilnýr Mırgalıev, Ystanbuldaǵy Marmara ýnıversıtetiniń professory Ilıas Kemaloǵlý jáne tarıh ǵylymdarynyń kandıdaty Nurlan Atyǵaev, Maraltaı Ybyraev jazǵan opera lıbrettosy dramatýrg Almas Núsiptiń pesasy negizinde ázirlengen.
Al rejısseri Davıde Lıvermore – álemdik opera ónerindegi maıtalman aty ańyzǵa aınalǵan ánshilermen jáne álemniń jetekshi teatrlarymen jumys istegen tulǵa. Onyń qoıylymdary La Skala, Rım operasy, Týrındegi Teatro Redjıo jáne Genýıadaǵy Karlo Felıche teatrlarynda sahnalanǵan. Metrdiń jobaǵa qatysýy operany halyqaralyq deńgeıge kóterdi.
Mýzykalyq jetekshi ári qoıýshy dırıjeri – Qazaqstannyń eńbek sińirgen qaıratkeri, Abaı atyndaǵy teatrdyń bas dırıjeri Nurjan Baıbosynov.
Tashkenttegi premera qazaq jáne ózbek mádenıeti men tarıhynyń tereń úndestigin pash etken shyǵarmashylyq dıalogke aınaldy. Bul sıntez eki halyqtyń myzǵymas ortaq tarıhı jadyn, rýhanı jaqyndyǵyn aıshyqtaǵan ózindik «óner kópirin» qalyptastyrdy. Buǵan deıin opera Almaty, Ystanbul, Qazan qalalarynda sahnalanyp, kórermenniń ystyq yqylasyna ıe bolǵan edi.
