Memleket basshysy qonaqjaılyǵy úshin Prezıdent Shavkat Mırzııoevke rızashylyǵyn bildirip, saparynyń basty maqsaty – qos halyqtyń dostyǵyn nyǵaıtyp, tatý kórshilik baılanystaryn kúsheıtý, sondaı-aq túrli saladaǵy ózara tıimdi yqpaldastyqty damytý ekenine nazar aýdardy.
– Qurmetti Shavkat Mıromonovıch, О́zińizdiń qajyrly eńbegińizdiń arqasynda elińizde kóptegen oń ózgeris bolyp jatyr. Halyqtyń ál-aýqatyn jaqsartýdy kózdeıtin mańyzdy bastamalar qolǵa alyndy. О́zbekstan – biz úshin týystas, aǵaıyn el, tatý kórshi ári senimdi seriktes. Qos el arasyndaǵy dostyqtyń tamyry tereń, halyqtarymyzdyń rýhanı qundylyqtary ortaq deýge bolady. Qazaq-ózbek qarym-qatynasy strategııalyq seriktestik jáne odaqtastyq rýhynda qarqyndy damyp kele jatyr, – dedi Memleket basshysy.
Qasym-Jomart Toqaev halyqaralyq ahýal aýmaly-tókpeli kezeńde san qyrly yqpaldastyqtyń damý qarqynyn arttyrý qajet ekenin atap ótti.
Memleket basshysy О́zbekstan Prezıdentimen kelissóz barysynda saıası jáne ekonomıkalyq baılanystardy jandandyra túsetin jańa baǵyttar aıqyndalǵanyn jetkizdi.
– О́zara yntymaqtastyq áleýetin tolyq paıdalanýdy quptaımyz. Sondyqtan osy baǵytta tabandy eńbek etýge daıyn ekenimizdi aıttyq. Eń áýeli, saýda-ekonomıka salasyna erekshe mán berý kerek. Saýda-sattyqty damytý úshin ósimniń tyń múmkindikterin izdeý, taýarlar nomenklatýrasyn keńeıtý jáne shıkizattyq emes eksportty yntalandyrý sharalaryn qabyldaý qajet. Osy oraıda О́zara taýar aınalymyn arttyrý baǵdarlamasyn sapaly júzege asyrý mańyzdy. Búgin qurylatyn О́ńir basshylary keńesin, sondaı-aq Iskerlik keńes pen «UzKazTrade» birlesken saýda kompanııasy sekildi basqa da ekijaqty mehanızmderdiń jumysynan naqty nátıje kútemiz, – dedi Qazaqstan Prezıdenti.
Memleket basshysynyń aıtýynsha, aýyl sharýashylyǵy salasyndaǵy yntymaqtastyqtyń áleýeti zor.
Qasym-Jomart Toqaev qarapaıym saýdadan góri et, bıdaı, maıly daqyldardy óńdeýdiń tolyq óndiristik tizbesin qalyptastyrýdy, mal sharýashylyǵy men organıkalyq egin sharýashylyǵyn birge damytýdy usyndy.
Buǵan qosa Prezıdent ónerkásip kooperasııasyna úlken úmit artady.
– Qazirgi kezde jalpy somasy bir jarym mıllıard dollardan (1,7 mlrd dollar) asatyn 78 birlesken jobamyz bar. Onyń aıasynda 15 myńnan astam jumys ornyn ashý kózdelgen. Atalǵan jobalar tolyq iske assa, ekonomıkalyq jáne ınvestısııalyq yqpaldastyǵymyz aıtarlyqtaı kúsheıedi. Búgin biz olardyń bir parasyn iske qosamyz. Qazaqstannyń О́zbekstanǵa salatyn ınvestısııasyn odan ári yntalandyrýǵa nıettimiz. Bul rette ózbek dostarymyzdan ádettegideı qoldaý kútemiz. Qurylysy júrip jatqan «Ortalyq Azııa» halyqaralyq ónerkásip kooperasııasy ortalyǵy ındýstrıaldyq qýatymyzdy odan ári arttyrýda mańyzdy ról atqarady, – dedi Qasym-Jomart Toqaev.
Prezıdenttiń pikirinshe, sırek kezdesetin metaldardy óndirý jáne óńdeý salasyndaǵy seriktestik perspektıvti baǵyttyń biri sanalady.
Qasym-Jomart Toqaev jańadan qurylatyn Jumys tobynan barlyq aspektini muqııat zerdelep, ózara tıimdi yntymaqtastyqty jolǵa qoıýǵa qatysty usynys berýdi surady.
Sonymen qatar Memleket basshysy kólik-tranzıt salasyndaǵy yqpaldastyqty keńeıtýdiń strategııalyq sıpatyna toqtaldy. Atap aıtqanda, tarıfterdi ońtaılandyrý, ákimshilik kedergilerdi azaıtý sharalary qabyldanyp, shekara mańy ınfraqurylymyn damytý jáne ótkizý beketterin jańǵyrtý jumystary qolǵa alyndy.
Qasym-Jomart Toqaev eki el úkimetteri logıstıkalyq tizbektiń barlyq qatysýshysyna ońtaıly jaǵdaı týǵyzyp, ınfraqurylymdyq, normatıvtik jáne ınstıtýsıonaldyq mindetterdi sheshýi qajet dep sanaıdy.
Budan bólek, Memleket basshysy Transkaspıı halyqaralyq kólik baǵdaryn, Soltústik – Ońtústik dálizin, sondaı-aq Aýǵanstan arqyly temirjol baǵytyn damytý aıasyndaǵy tıimdi yqpaldastyqty jalǵastyrý ózekti ekenin aıtty.
Qasym-Jomart Toqaev ózbek tarapyn Transkaspıı halyqaralyq kólik baǵytyn birge órkendetý úshin Aqtaý jáne Quryq porttary boıynsha seriktestik quryp, logıstıkalyq jobalardy júzege asyrýǵa shaqyrdy.
Qazaqstan Prezıdenti sý-energetıka salasyndaǵy konstrýktıvti yntymaqtastyq asa mańyzdy ekenin jetkizdi. О́ıtkeni transshekaralyq ózenderdiń sý resýrsyn rasıonaldy paıdalaný – eki eldiń turaqty progresine yqpal etetin basty faktorlardyń biri.
Bul oraıda Qasym-Jomart Toqaev Qazaqstan men О́zbekstan úkimetterine sý sharýashylyǵy saıasatyndaǵy tásilderdi úılestirý úshin júıeli sharalar ázirleýdi usyndy.
Memleket basshysy jasandy ıntellektini damytý máselesine aıryqsha nazar aýdardy.
– Qazaqstanda memlekettik basqarýdyń tıimdiligin jáne azamattardyń turmys sapasyn jaqsartý maqsatynda memlekettik qyzmetterdi sıfrlandyrýǵa jáne IT tehnologııalardy damytýǵa basa mán beriledi. Alem.ai Halyqaralyq jasandy ıntellekt ortalyǵy ashyldy, osy saladaǵy Zertteý ýnıversıtetiniń negizi qalanýda, ulttyq sýperkompıýter iske qosyldy. Jalpy, Qazaqstandy sıfrlyq elge aınaldyrý mindeti qoıyldy. О́zbekstan da sıfrlandyrýǵa jáne jasandy ıntellekt tehnologııasyn damytýǵa baǵyt alǵanyn bilemiz. Atalǵan salada birqatar jetistikke qol jetkizdi. О́zbek kompanııalaryn tyǵyz yntymaqtastyq ornatyp, osynaý keleshegi zor salada birlesken jobalardy júzege asyrýǵa shaqyramyz. Astana Hub pen IT Park Uzbekistan arasyndaǵy yntymaqtastyq osyndaı tabysty sınergııaǵa mysal bola alady, – dedi Prezıdent.
Memleket basshysynyń aıtýynsha, mádenı-gýmanıtarlyq baılanystardyń órisi keńeıe bastady. Bul rette Prezıdent mádenıet kúnderin ótkizý, shyǵarmashylyq ıntellıgensııa, jastar arasynda belsendi dıalog qalyptastyrý, kórnekti tulǵalarǵa eskertkish ornatý, sondaı-aq О́zbekstan men Qazaqstan joǵary oqý oryndarynyń fılıaldaryn ashý máselelerin qozǵady.
Qasym-Jomart Toqaev qol jetkizilgen ýaǵdalastyqtar qos halyqtyń ıgiligi jolynda san qyrly baılanystardy odan ári tereńdetýge septigin tıgizetinine senim bildirdi.
О́zbekstan Prezıdenti ekijaqty yntymaqtastyqty keńeıtýde Joǵary memleketaralyq keńes mańyzdy ról atqaratynyn jetkizdi
– Bizdiń qarym-qatynastarymyz strategııalyq seriktestik pen odaqtastyqtyń joǵary deńgeıine kóterildi. Onyń negizinde berik senim, baýyrlas halyqtarymyzdyń arasyndaǵy tatý kórshilik jáne shynaıy dostyq jatyr. Byltyr qurylǵan Joǵary memleketaralyq keńes ózektiligi men tıimdiligin kórsetti. Búgin ekinshi otyrysta biz ózara yqpaldastyqtyń jańa baǵyttaryn jáne zor áleýetimizdiń tyń múmkinderin tanytýdyń joldaryn jan-jaqty talqylaımyz. San qyrly seriktestigimizdi keńeıtýge aıtarlyqtaı serpin beretin sheshimder qabyldaımyz. Qazirgi almaǵaıyp kezeńde elderimizdiń jáne tutas aımaqtyń ekonomıkalyq konıýnktýrasyna oń áser etetin tyǵyz jáne proaktıvti yqpaldastyq erekshe mánge ıe, – dedi Shavkat Mırzııoev.
