Derekterge súıensek, 1965 jyldyń 1 qyrkúıeginde Semeı telestýdııasynyń alǵashqy resmı habary efırge shyqty. Bul respýblıkadaǵy Almaty, Qaraǵandy, О́skemen, Aqtóbe televızııalyq stýdııalarynan keıingi besinshi, Keńes odaǵy boıynsha 116 stýdııa eken.
Búginde «SEMEI» telearnasy táýligine 14 saǵat habar taratady. Kórermenge 30-ǵa jýyq avtorlyq baǵdarlama usynady. Jańalyqtar qyzmeti kúnine bes ret efırge shyǵady. Aqparattyq keńistikte arna jumysyn jańa deńgeıge kóterý maqsatynda «Digital SEMEI» shyǵarmashylyq bólimi ashylyp, jańa medıany damytý isi bastaldy.
Telearna alǵash ret Qytaı Halyq Respýblıkasynan tikeleı aqparat taratyp, halyqaralyq deńgeıde efırge shyqty. Uly Abaıdyń 180 jyldyq mereıtoıy kezinde arna tikeleı efır arqyly jáne áleýmettik jelilerde jedel aqparat taratty. Sonymen qatar, bıyl kóptegen derekti fılm men «Taza Qazaqstan» baǵdarlamasyna baılanysty tárbıelik máni bar beınerolıkter túsirildi. Telearnanyń mereıtoıy aıasynda Semeı qalasyndaǵy bir kóshege qazaqtyń «Levıtany» atanǵan radıo júrgizýshisi, dıktor, Qazaqstannyń halyq ártisi Ánýarbek Baıjanbaevtyń esimi berildi.
О́ńirdiń aınasyna aınalǵan telearnanyń 60 jyldyǵyna arnalǵan saltanatty is-shara Abaı atyndaǵy oblystyq kitaphanada ótti. Oǵan oblys ákimi Berik Ýálı, «Qazaqstan» Ulttyq telearnasynyń dırektory, belgili jýrnalıst Bolat Múrsálim jáne ardager jýrnalıstermen qatar qalanyń zııaly qaýym ókilderi qatysy. Jıynda aımaq basshysy telearna ujymyn mereıli mereıtoımen quttyqtady.
«Alpys jyl – tek bir ujymnyń ǵana emes, tutas óńirdiń tarıhyna aınalǵan zor beles. Ýaqyttyń synynan ótken, ulttyń únin jetkizgen rýhanı arnanyń merekesi! Memleket basshysy Qasym-Jomart Toqaev: «Túptep kelgende, memleket te, jýrnalıst te ult úshin qyzmet etedi, el taǵdyryn sheshýge atsalysady. О́ıtkeni, ult baspasózi men ult múddesi qaı kezde de ózektes bolǵan. Qazir de solaı» degen sózi bizdiń Semeı telearnasynyń jolyna, rýhyna dóp keledi. Sol alǵashqy habarlardan bastap búginge deıin halyqtyń úmitin, eldiń tynysyn jetkizdi. El úshin jańa dáýirdiń bastaýy boldy. Sol kezden beri Semeı telearnasy – ýaqyttyń kýási, eldiń aınasy, rýhtyń minberi bolyp keledi. Búgingi mereıtoı – ótkenge taǵzym, bolashaqqa senim syılaıdy! Alpys jyldyq abyroıly tarıh el men eldi, urpaq pen ultty jalǵaǵan altyn kópir! Semeı telearnasy – Semeıdiń úni, Abaı eliniń rýhy! Qurmetti áriptester, barshańyzdy ujymnyń mereıli merekesimen shyn júrekten quttyqtaımyn!» dedi oblys ákimi.
Saltanatty jıynda telearnanyń ardagerleri men qyzmetkerlerine mereıtoılyq marapattar tabystaldy. Telearna ardagerleri Fatıma Begenbaeva, Zınaıda Omarova, Muratqazy Alın, Tilegen Ahmetov Mádenıet jáne aqparat mınıstrliginiń «Eńbek ardageri» medalimen, shef redaktor Gúlnáz Káýken, operator Eljan Maǵzumov, redaktor Baqytgúl Qazez «Aqparat salasynyń úzdigi» tósbelgisimen marapattaldy. Telearnanyń birqatar qyzmetkerleri Mádenıet jáne aqparat mınıstrliginiń Alǵyshaty jáne «Qurmet» gramotasyn, oblys ákiminiń Alǵyshatyn aldy. Aımaq basshysy saltanatty keshte telearna ujymyna oblys jurtshylyǵy atynan avtokóliktiń kiltin tabys etti.
Abaı oblysy
