Myń úmittiń bastaýy

Bizdi talantyna tánti etken Mań­ǵystaý ólkesinen kelgen Karasý Ahmet Mýstafa Býrak pen Aqmola oblysynyń týmasy Sergeı Komarov edi. Olar arnaıy Astanaǵa at basyn buryp, Qazaqstan hal­qy Assambleıasynyń «Myń bala» respýb­lıkalyq mádenı-aǵartýshylyq jobasyna qatysýǵa kelipti. Bularmen birge ár oblys pen qaladan kóptegen etnos ókil­deri memlekettik tilde án shyrqap, dom­byra shertti. Atalǵan sharanyń eń áser­li bóligi – «О́nerli órge júzer» mýzy­ka­lyq baıqaýy boldy. Jeńimpazdar dás­­túr boıynsha Qazaqstan halqy Assamb­­leıasynyń dıplomdarymen, baǵa­ly syılyqtarymen marapattaldy. Bıyl­ǵy joba Abaı Qunanbaıulynyń 180 jyl­dyǵy men kúıshi-kompozıtor Nurǵısa Tilendıevtiń 100 jyldyǵyna arnaldy.

Jas daryndar bas qosqan sharada Qyzylorda oblysynyń týmasy Tımýr Júsipov Abaıdyń «Kózimniń qarasy» ánin, jetisýlyq Ksenııa Dýbınskaıa men Astana qalasynyń týmasy Vafına Elmıra Qurmanǵazynyń kúıi «Balbyraýyndy» oryndady. Bul baıqaýǵa olardyń baryn salyp daıyndalǵany baıqalady. Shyny kerek, ónerdiń bir aty – izdenis. Izdenis toqtaǵan jerde ónerdiń qasıeti men quty qashpaq. Al myna jas talanttar birinen-biri asyp, bir sát sanańdy san túrli aǵyspen terbeıdi.

Abaı oblysynyń týmasy Eva Roma­nenko Nurǵısa Tilendıevtiń «Qustar» ánin tamyljyta oryndap, án avtorynyń ǵasyrlyq toıyna ózgeshe syı jasady. Týyndyny jetkize oryndaýy onyń bolashaqta daryndy ánshi bolatynyn dáleldep turǵandaı. Bul is-sharanyń taǵy bir ereksheligi, mektep jasyndaǵy ózge ult balalarynyń patrıottyq seziminiń kúshtiligin kórsete alǵandyǵy. «Týǵan jer», «Atameken», «Uly qazaǵym» atty ánder shyrqaldy.

Qazaqstan halqy Assambleıasy tór­a­ǵa­synyń orynbasary, Prezıdent Ákim­shiliginiń Qazaqstan halqy Assambleıasy hatshylyǵynyń meńgerýshisi Marat Ázilhanov sóz sóılep: «Bul joba eli­mizdegi kelisim men tatýlyqtyń, jas urpaq­tyń boıyndaǵy dostyq pen ózara syı­lastyqtyń aıqyn kórinisi. «Myń bala» – ár óńirden kelgen jas daryndardy bir jerde toǵystyryp, mádenıetter men dástúrlerdiń ortaq qundylyǵyn dárip­teıtin biregeı joba. On jyl boıy uıym­dastyrylyp keledi. Jobaǵa 3 mıllıonnan astam bala qatysyp, 130 myńǵa jýyq shara uıymdastyryldy. Bul arqyly mem­lekettik tilimizdi dáripteýge jol asha­myz. Osy jobaǵa qatysyp, tulǵa bol­ǵan azamattar da kóp. Solardyń ishi­nen Senat depýtaty Gennadıı Genna­dıevıch Shıpovskıhty aıtqym kele­di. Sonymen birge Alla Gavrına da osy joba arqyly kórermender kóz­aıy­myna aınaldy. Osyndaı tulǵalar bú­gingi qatysýshylardyń arasynan da shy­ǵary sózsiz. «Myń bala» jaı ǵana shy­ǵar­mashylyq baıqaý emes, urpaq­tar sabaqtastyǵy men rýhanı bir­liktiń mektebi dep bilgen durys», dedi.

Shyn­dy­ǵynda atalǵan jobanyń maqsaty – túrli etnostardyń memlekettik tildi úırenýge yntaly jas ókilderin qol­daý, olardyń shyǵarmashylyq qabilet­te­rin damytý, dostyqty nyǵaıtýǵa úles qosý.

Is-shara sońynda osy baıqaýdy uıym­dastyrýshy taraptyń ókilin de sóz­ge tarttyq. Qoǵamdyq kelisim memle­ket­tik mekemesiniń bólim basshysy Eldos Jumaǵulov bylaı dedi: «Bul – Qazaq­stan halqy Assambleıasynyń negizgi joba­larynyń biri. Aǵartýshylyq jaǵy da basym. Basty maqsat – etnos ókilderi arasynda memlekettik tildi, dástúrimizdi, ónerimizdi nasıhattaý. Osy arqyly birlik ıdeıasyn júzege asyrýdy kózdedik. Jyl boıy ár óńirde ótkizip, jeńimpazdardy Astanada marapattaımyz».

Almaty qalasy Jetisý aýdandyq №101 mektep-gımnazııasynyń 9 «B» synyp oqýshysy Dılnaz Azatova «Uly qazaǵym» atty ándi oryndap, bárimizdi tań­dandyrdy. Ulty uıǵyr bolsa da, júregi qazaq dep soǵatynyn dáleldegen ol: «Bul án meni rýhtandyrady. Sol úshin de men ony qyzyǵyp jattadym. Mátinine nazar salsańyz, «Saq pen ǵunnan jalǵasqan» degen sóz bar. Bul qazaq halqynyń tereń tamyrly tarıhyn aıtyp tur. Qyzyqqanym sonsha, bul ándi eki kúnde úırenip aldym».

Iá, ǵalamda tatýlyq pen birlikten as­qan eshteńe joq shyǵar. Ǵasyrlar sarynynda bizdiń ólkemizde san ult pen ulys oryn teýip, ulan-ǵaıyr qazaq dala­synyń qushaǵynda baqyttyń besigin ter­betti. Osynyń bári memleket qurýshy ult­tyń darhan kóńili men taza júreginiń lúpi­liniń belgisi. Tatýlyq barda kún de shýaq­ty, aı da ajarly, Otan da qýatty bola bermek.