Teatr ujymyn Mádenıet jáne aqparat mınıstri Aıda Balaeva quttyqtady. Mınıstrdiń quttyqtaý sózin Mádenıet komıtetiniń tóraǵasy Erlan Dákenov oqydy.
– Teatr – halyqtyń rýhanı qazynasy, mádenıetimizdiń ózegi. Búginde elimizde teatr ónerine degen qyzyǵyýshylyq artyp, kórermen talǵamy kún sanap bıikteı túsýde. Bul eń aldymen sizderdiń qajyrly eńbekterińiz ben ólsheýsiz shyǵarmashylyq izdenisterińizdiń jemisi dep bilemin. Uly Muhtar Áýezovtiń esimin ıelengen teatrdyń ult rýhanııatyn damytýda alatyn orny bıik. Qazaqtyń ulttyq teatr ónerin joǵary deńgeıge kóterip, ony gúldendirý jolynda atqarǵan qyzmetterińiz berekeli, tabysty bolsyn. О́resi bıik kórermendi tolǵandyratyn, jan-dúnıesine rýhanı baılyq syılaıtyn jańa týyndylaryńyz kóp bolsyn, – delingen quttyqtaý hatta.
Kesh barysynda kórermen nazaryna teatr repertýaryndaǵy tańdaýly qoıylymdardan úzindiler usynyldy. Keshte ulttyq teatr óneriniń damýyna eleýli úles qosqan belgili akterlerdiń óneri arqyly ótken men búginniń kórkem sabaqtastyǵy kórinis tapty.
Sonymen qatar teatr mýzeıi kelýshiler nazaryna «Ǵasyr jasaǵan ult teatry» atty ınteraktıvti kórme usyndy. Onda eksponattar men arhıv materıaldary zamanaýı formatta kórsetildi.
Aıta keteıik, qazaq óneriniń qara shańyraǵy, kásibı teatrdyń shymyldyǵy 1926 jyly 13 qańtarda, Qyzylorda qalasynda ashyldy. Bastapqy qoıylymdary Q. Kemeńgerulynyń «Altyn saqına» jáne M. Áýezovtiń «Eńlik – Kebek» pesalarynan úzindiler boldy. Teatrdyń alǵashqy quramynda I. Baızaqov, Á. Qashaýbaev, S. Qojamqulov, E. О́mirzaqov, J. Shanın, Q. Qýanyshbaev, Q. Jandarbekov, Q. Badyrov, Q. Muńaıtpasov, Z. Atabaeva, Sh. Álibekova, Sh. Baızaqova, M. Shamova, J. Shanına t. b. eńbek etti.
1928 jyly teatr Almatyǵa kóshti. 1937 jyly 27 aqpanda «akademııalyq» teatr mártebesin aldy. 1961 jyly teatr jazýshy, ǵalym Muhtar Omarhanuly Áýezovtiń esimin ıelendi. Al 2020 jyldyń 20 jeltoqsanynda Memleket basshysynyń Jarlyǵymen teatrǵa Ulttyq mártebesi berildi.
Áýezov teatrynyń bir ǵasyrlyq tarıhy – halyqtyń úni, zamannyń tynysy, ulttyń rýhy. Qazirgi tańda teatr óziniń mádenı-rýhanı mıssııasyn naqty aıqyndaǵan shyǵarmashylyq ujym retinde ulttyq ónerdi dáripteý, otansúıgishtik pen adamgershilik qundylyqtardy nasıhattaý, jańa turpatty mádenıet jasaý jáne álemdik mádenı keńistikke ulttyq ónerimizdi tanytý jolynda tabandy eńbek etýde.
