Elbasy Joǵary Eýrazııalyq ekonomıkalyq keńestiń otyrysyna qatysty

ASTANA. 9 mamyr. Elbasy Joǵary Eýrazııalyq ekonomıkalyq keńestiń otyrysyna qatysty. Bul týraly akorda.kz habarlady. Kezdesýge prezıdentter – Qazaqstannan – Nursultan Nazarbaev, Armenııadan – Serj Sargsıan, Belarýs Respýblıkasynan – Aleksandr Lýkashenko, Qyrǵyzstannan – Almazbek Atambaev, Reseı Federasııasynan Vladımır Pýtın, sondaı-aq, Eýrazııalyq ekonomıkalyq komıssııa alqasynyń tóraǵasy V.Hrıstenko qatysty. Memleket basshylary Eýrazııalyq ekonomıkalyq odaq qyzmetiniń qazirgi máselelerin, uıym aıasyndaǵy seriktestikti tereńdetý men halyqaralyq yntymaqtastyq aıasyn keńeıtý keleshegin, sondaı-aq, Qyrǵyzstannyń Odaqqa qosylý úderisin talqylady. Otyrysqa qatysýshylarǵa arnaǵan sózinde Nursultan Nazarbaev Eýrazııalyq ekonomıkalyq odaq qurý týraly shartqa qol qoıylǵanyna bir jyl tolǵanda ótip otyrǵan kezdesýdiń aıryqsha sıpatyn atap aıtty. «Múddeler teńdigi, pragmatızm jáne kezeńdilik qaǵıdattaryna negizdelgen ıntegrasııalyq birlestik bizdiń memleketterimizdi jáne ekonomıkalarymyzdy álemdik daǵdarystyń kúrdeli jaǵdaıynda nyǵaıtýǵa qabiletti ekenine senimdimin. Eýrazııalyq ekonomıkalyq odaq jumysy túbegeıli bastalǵaly beri bizdiń qatarymyz Armenııa jáne Qyrǵyzstannyń qosylýy arqyly tolyqty. Birlesken yntymaqtastyq bolashaqta elderimizdiń baılanysyn nyǵaıtyp, Eýrazııalyq odaqtyń damýyna tyń serpin bereri anyq», – dedi Qazaqstan Prezıdenti. Memleket basshysy halyqaralyq qoǵamdastyqtyń bul ekonomıkalyq birlestikke qyzyǵýshylyǵy artyp kele jatqanyna toqtaldy. «Búginde birqatar memleketter bizge saýda-ekonomıkalyq qatynastar ornatý, erkin saýda usynysymen shyǵýda. Máselen, úkimetaralyq keńes otyrysynyń aıasynda Eýrazııalyq ekonomıkalyq odaq pen Vetnam arasynda erkin saýda aımaǵy týraly birinshi kelisimge qol qoıý josparlanyp otyr. Kelisim jobasy qazir memleketishilik úderiste qarastyrylyp jatyr. Sondaı-aq, búginde Qytaı Halyq Respýblıkasymen seriktestik jáne yntymaqtastyq týraly kelisim jasaý jónindegi kelissózderdi bastaý máselesi kún tártibinde tur. Túrkııa, Iran, Úndistan, Mońǵolııa, Ázerbaıjan osy kezeńdegi kelesi áleýetti seriktester bola alar edi,, – dedi Nursultan Nazarbaev. Qazaqstan Prezıdenti qabyldanǵan sheshimderdi júzege asyrý jumysy úkimet tarapynan da, komıssııa tarapynan da júıeli jáne birizdi yńǵaıdan kelýdi talap etetinine nazar aýdardy. «Barlyq ýaǵdalastyqtardy kezeń-kezeńmen iske asyrý merzimderin biz aıqyndap aldyq. Uıymymyz birtindep barynsha tıimdi sıpat alyp keledi, qajetti sharttyq baza qalyptasýda. Onyń ornyqty damýy osyǵan negizdeledi», – dedi Memleket basshysy. Nursultan Nazarbaev álemdegi kúrdeli ekonomıkalyq jaǵdaıǵa qaramastan, Eýrazııalyq ekonomıkalyq odaq ózine múshe elderdiń barlyǵynyń ıgiligi jolynda budan ári damý úshin zor áleýetke ıe ekenine senim bildirdi. «Qazir, daǵdarys pen Batystyń sanksııalyq saıasaty jaǵdaıynda taýar aınalymynyń tómendeýi baıqalady. Biraq bizdiń qarym-qatynasymyzdyń jalpy jaǵdaıy sondaı – kásiporyndar men taýarlardyń aýysýy, birlesken kásiporyndardyń qurylýy úderisi júrip jatyr. Biz durys jolda kelemiz dep sanaımyn. Qazaqstan elderimizdiń arasyndaǵy saýda-ekonomıkalyq yntymaqtastyqtyń orasan áleýetine ıe Eýrazııalyq ekonomıkalyq odaq jumysyna asa zor mańyz berip keldi jáne solaı bola da beredi. Biz ózara tıimdi qujattardy ázirleý men qabyldaý úshin qajetti kúsh-jigerdi jumyldyratyn bolamyz», – dedi Qazaqstan Prezıdenti. Otyrys barysynda memleketaralyq yntymaqtastyqty túrli salalarda odan ári damytýǵa baǵyttalǵan birqatar qujattarǵa qol qoıyldy. Elaman Qońyr. Derek, sýret: akorda.kz.