Elektrodsyz kardıostımýlıatordyń basty ereksheligi – onyń júrek qýysyndaǵy tinge tikeleı engizilýi. Operasııa kezinde qurylǵy jambas qantamyrlary arqyly jetkiziledi. Endi erterektegideı elektrodtardy tartý nemese teri astyna arnaıy «qalta» jasaýdyń qajeti joq. Ozyq tásil asqyný qaýpin azaıtyp, naýqastyń tez ońalýyna múmkindik beredi.
Aýrýhananyń arıtmolog-hırýrgi Nurlan Elemesovtiń aıtýynsha, jańa qurylǵynyń kólemi nebári eki santımetr ǵana, ol júrektiń oń jaq qarynshasyna ornatylady.
– Qurylǵy júrek ótkizgishtigin qalpyna keltirip, qalypty yrǵaqty saqtaýǵa kómektesedi. Operasııadan keıingi kelesi kúni-aq naýqas ózdiginen júrip-tura alady. Bul burynǵy ádisterge qaraǵanda áldeqaıda tıimdi ári qaýipsiz tásil, – deıdi dáriger.
Oblysta jyl saıyn 200-den astam naýqasqa kardıostımýlıator ornatylady eken. Qaraǵandy dárigerleri alǵash ret elektrodsyz qurylǵy arqyly jasaǵan operasııa ári qaraı da jalǵasyp, naýqastardyń ońalyp ketýine septigin tıgize beredi. Operasııa elimizdiń jetekshi arıtmologteriniń qatysýymen, sondaı-aq BAÁ men AQSh-tan shaqyrylǵan mamandardyń, «Abbott» kompanııasynyń klınıkalyq seriktesterimen birlese atqaryldy.
– Mundaı qurylǵy 20–25 jylǵa deıin qyzmet ete alady. Árıne, bul merzim onyń ıesiniń ómir saltyna da baılanysty. Qajet bolǵan jaǵdaıda qurylǵyny jańasyna aýystyrý múmkindigi bar. Qaraǵandy dárigerleriniń kásibıligi joǵary deńgeıde, barlyq qajetti qural-jabdyq der kezinde daıyn boldy, – deıdi «Abbott» kompanııasynyń klınıkalyq mamany Hader Abý Halaf.
Densaýlyq saqtaý mınıstrliginiń shtattan tys bas arıtmologi, Qazaq arıtmologter qoǵamynyń prezıdenti Aıan Abdrahmanov jańa tehnologııanyń elimizdiń birneshe qalasynda engizilip jatqanyn atap ótti.
– Elektrodsyz kardıostımýlıator – álemdik medısınadaǵy eń jańa jetistikterdiń biri. Qazirde mundaı operasııalar Astana, Almaty, Aqtaý, Semeı, Shymkent qalasynda jasalyp keledi. Endi osy qatarǵa Qaraǵandy da qosyldy. Bul ádis burynǵy úlgidegi kardıostımýlıatorlarmen salystyrǵanda anaǵurlym tıimdi. Ol teriasty qaltalaryna, elektrodtarǵa baılanysty asqynýlardyń aldyn alyp, naýqastardyń ómir sapasyn jaqsartady. Eń bastysy – bul tehnologııa eldegi barlyq turǵynǵa qoljetimdi bolýǵa tıis, – dedi ol.
Jańa ádispen operasııa jasalǵan alǵashqy naýqastardyń biri – Qaraǵandy qalasynyń turǵyny Evgenııa Bondarenko. Ol operasııadan keıingi jaǵdaıy týraly aıtyp, medısına qyzmetkerlerine rızashylyǵyn bildirdi.
– Bastapqyda ýaıym bolǵany ras, biraq dárigerlerdiń sheberliginiń arqasynda bári jaqsy ótti. Qazir ózimdi jeńil ári jaqsy sezinemin. Dárigerler men medbıkelerge úlken alǵys aıtamyn, – dedi em alýshy.
Keıingi jyldary Qaraǵandy óńirinde densaýlyq saqtaý salasy ınfraqurylymdary jańartylyp, medısına mekemeleri sıfrlandyrylyp, joǵary tehnologııaly qural-jabdyqtar ornatylyp, kadrlyq áleýet artyp keledi. Medısınanyń damý qarqynyna baılanysty oblysta telemedısına, sıfrlyq sheshimder, avtomattandyrylǵan tirkeý, elektrondy densaýlyq pasporty sııaqty jańashyl joba júzege asyrylyp jatyr. Munyń barlyǵy sapaly, qoljetimdi medısınalyq qyzmet kórsetýge jol ashty.
Qaraǵandy dárigerleriniń jetistigi – óńir medısınasynyń ǵana emes, jalpy elimizdegi densaýlyq saqtaý júıesiniń qaryshty qadamy. Elektrodsyz kardıostımýlıatordy ornatý operasııasy elimizde joǵary tehnologııaly medısınalyq kómektiń jańa kezeńin bastap berdi. Bul jańalyq – otandyq medısınanyń múmkindigi artqanyn, bilikti mamandar men zamanaýı tehnologııalardyń adam ómirin saqtaýda sheshýshi ról atqaratynyn taǵy bir márte dáleldedi.
Qaraǵandy oblysy
