Foto: Qorǵanys mınıstrligi
Jobaǵa zor daıyndyqpen kelgen ol alǵashqy ánin oryndaǵannan-aq 3 birdeı tálimgerdiń nazaryn ózine aýdartty.
«Qazaqstandy úlken sahnada tanystyrý – men úshin úlken mártebe. Ár ánimdi júregimmen oryndaımyn, adamdar meniń Otanǵa degen súıispenshiligimdi sezinse deımin», dedi jas ánshi.
Qorǵanys mınıstrliginiń málimetinshe, 12 jastaǵy almatylyq Jasmına Túzelova Aýǵan soǵysy ardageri Muratbek О́teevtiń otbasynda dúnıege kelgen. Vokalmen aınalysýdy 5 jasynan bastaǵan. 8 jasynda ulttyq «Bala daýysy» baıqaýynda bas júldeni jeńip aldy. 2023 jyly Jasmına halyqaralyq «Balalardyń Jańa tolqyny» festıvaliniń fınalynda tamasha óner kórsetken. Al 2025 jyly Ortalyq áskerı orkestr men Ortalyq ansambl ujymymen birge Jeńistiń 80 jyldyǵyna arnalǵan «Spassk munarasy» XVII Halyqaralyq áskerı-mýzykalyq festıvaline qatysty. Qyzyl alańda ol ańyzǵa aınalǵan «Álııa» ánimen kórermenderdi tamsandyrdy.
«Jasmına kishkentaıynan shyǵarmashylyqqa jaqyn. Onyń árbir jeńisi – úlken eńbektiń nátıjesi. Qyzymyzdyń basqa balalarǵa shabyt berip, ózine senýge úıretip júrgenine qýanyshtymyz», deıdi anasy Gúlzııa О́teeva.
