Qazaqstan Uly Jeńis kúnin atap ótýde

ALMATY. 9 mamyr. Búgin – 9 mamyr Jeńis kúni! Berlınniń túbinde fashısterdiń qarsylyqsyz tize búkkeni týraly Aktige 1945 jyldyń 8 mamyrynda túngi saǵat 22:43-te qol qoıyldy. Máskeý ýaqyty boıynsha bul sát – 9 mamyr 00:43 edi. Ýaqyt aıyrmashylyǵyna baılanysty sol kúnnen bastap Jeńis merekesin – Eýropa 8 mamyr, Keńes Odaǵy – 9 mamyr kúni atap ótetin bolǵan. Bul týraly egemen.kz habarlady. Tarıh pen ýaqyt bezbenine salynǵan bul soǵys búginge deıin Uly Otan soǵysy degen ataýǵa ıe. Onyń bolashaqta qalaı atalýy adamdar men tarıhtyń enshisinde. Degenmen, bul zulmattyń Ekinshi dúnıejúzilik soǵys degen ataýyna kózimiz de, qulaǵymyz da úırenip keledi. Sonymen, atalǵan soǵys 1941 jyldyń 22 maýsymynda bastalyp, 1945 jyldyń 9 mamyrynda aıaqtaldy. Qazaqstannan 1,5 mıllıonǵa jýyq azamat maıdanǵa attandy. Onyń teń jarymy Otanyna oralmady. Eldiń 500-den astam azamaty Keńes Odaǵynyń Batyry ataǵyna ıe boldy. Jahandyq qantógiste qazaqtyń úlesi qandaı degen saýaldyń jaýaby da daıyn! Soǵys bastalǵan sátte qoısha qyryldy. Keńes ásker basylarynyń aqylynyń jetkeni – qazaqtardy atqa mingizip, aýyr tankige qarsy shaptyrdy! Baýdaı tústi, qyrylyp qaldy. Mashýkova, Rjev, Smolen sekildi shaıqastarda, qanshama bozdaq suraýsyz ketti, qurban boldy. Biraq, qazaq soǵan qaramastan, janyn aıamaı, Otany úshin, bolashaǵy úshin shaıqasty. Baýyrjan, Álııa men Mánshúk, Talǵat, Rahymjan, Qasym. Tolyp jatqan ult maqtanyshtarynyń esimderi Uly Otan soǵysynyń tarıhynda altyn áriptermen jazyldy. Búgin halqymyzdyń osyndaı batyr ul-qyzdarynyń erligin pash etip, qaısarlyǵyn nasıhattar kún. Soǵan baılanysty Astana, Almaty jáne Qazaqstannyń barlyq qalalary men aýdan ortalyqtary Uly Jeńisi merekesin saltanatty túrde atap ótýde. Talǵat Súıinbaı. Derek: egemen.kz. Sýret: bnews.kz.