Jaýhar óner sheberleri sulýlyq pen sezimniń bıik úlgisin pash etti. Talǵamy bıik kórermen American Ballet Theatre (Nıý-Iork) trýppasynyń prıma-balerınasy Hloıa Mısseldaın men Staatsballett Berlin trýppasynyń premeri Martın ten Kortenaardyń ónerine tánti boldy.
Qoıylymǵa deıin jýrnalısterdiń qatysýymen ótken baspasóz májilisinde sheteldik meımandar óz áserlerimen bólisip, Berlin Ballet Company kórkemdik jetekshisi Arshak Galýmıan qazaq jerinde óner kórsetý balet sheberlerine aıryqsha shabyt beretinin ári jańa múmkindikterge jol ashatynyn atap ótti. Joba prodıýseri Danııar Shmanov festıval aýqymy jyl saıyn keńeıip kele jatqanyn, óner men mádenıettiń órisin keńeıtý jobanyń negizgi maqsaty ekenine toqtaldy.
«Freedom Festival — ónerdi, ózindik bolmysty jáne baletke degen batyl kózqarasty biriktiretin dástúrge aınaldy. Bıyl biz klassıka men zamanaýı horeografııany, qazaqstandyq ónerpazdar men sheteldik trýppalardy toǵystyra otyryp, úırenshikti shekaralardy keńeıtemiz. Mundaı úndestik — festıvaldiń negizi – ónerdiń tiri tynysyn, dıalogqa, shabyt pen birigýge degen umtylysymyzdy kórsetedi», – deıdi Freedom Finance Global dırektorlar keńesiniń tóraǵasy Sergeı Lýkıanov.
Dástúr boıynsha festıval aıasynda zamanaýı óner kórmesi usynyldy. Bıylǵy festıvaldiń arnaıy qonaǵy – halyqaralyq art-sahnalarda Qazaqstan men О́zbekstan atynan shyǵyp júrgen tanymal sýretshi Azıza Shaden. Ol О́zbekstan Mádenıet pen ónerdi damytý qorynyń qoldaýymen jasalǵan, alǵash ret Buhara Bıennalesinde kórsetilgen beıneınstallıasııasyn usyndy. Bul jumys qazaq kórermenine alǵash ret jol tartyp otyr.
